Ливияда намойишчилар парламент биносига ўт қўйди

Ливия шарқидаги Тобрук шаҳрида мамлакатда электр энергияси ўчирилиши ва яшаш шароитлари ёмонлашишига қарши намойишга чиққанлар парламент биносини штурм билан эгаллади ва ёқиб юборди, деб ёзади «РБК».

Libya News Agency маълумотларига кўра, намойишчилар бино ичидаги расмий ҳужжатларга, кабинетларга ва қабулхона залларига ўт қўйган.

Бундан ташқари, намойишлар Триполида ҳам бўлиб ўтди. Акциялар иштирокчилари маҳаллий ҳукумат органларини тарқатиб юбориш, президент ва парламент сайловларини ўтказиш, шунингдек, электр энергияси билан боғлиқ инқирозни тартибга солишни талаб қилмоқда.

Сиёсий беқарорлик Ливияда 2011 йилда Муаммар Қаддафий ҳокимиятдан ағдарилиб, ўлдирилганидан буён кузатилмоқда. Мамлакатда ягона бошқарув органини шакллантиришга эришилмади, оқибатда турли гуруҳлар орасида қуролли низо, кейинчалик эса халқаро тан олинган муваққат ҳукумат ва генерал Халиф Хафтар раҳбарлигидаги Ливия миллий армияси ўртасида фуқаролар уруши келиб чиқди.

2020 йилда халқаро ҳамжамият иштирокидаги музокаралар йўли билан қўшма ҳарбий комиссия тузилди, у ерга низо томонлари кирди ва улар бутун Ливия ҳудудида ўт очишни тўхтатишга келишиб олди.

10 февраль куни қонун чиқарувчилар миллий бирлик ҳукумати мандати декабрь охирида тугади деб ҳисоблаб, Фатхи Башагини янги бош вазир этиб сайлади, 3 март куни унинг ҳукумати қасамёд қабул қилди. Бундан аввалги бош вазир Абдул Дбейба лавозимдан кетишдан бош тортмоқда, унинг фикрича, фақат унинг вазирлар маҳкамасигина сайловларга тайёргарликни амалга ошириш ваколатига эга. У лавозимни фақат қонуний сайланган давомчисига беришини таъкидламоқда.