Liviyada harbiylar hukumat binosini egallab oldi — OAV
Liviya poytaxti Tripolida 15-dekabr kuni kechqurun qurollangan shaxslar prezident saroyini egalladi va hukumat hamda Mudofaa vazirligi binolarini qurshab oldi. Bu haqda Sky News Arabia’ga tayanib, “Korrespondent.net” xabar berdi.
Nashr ma’lumotlariga ko‘ra, mamlakat Prezident kengashi raisi va a’zolarining uylariga hujum uyushtirishga tayyorgarlik ketayotgani to‘g‘risida ma’lumotlar olingach, ular xavfsiz joyga ko‘chirilgan.
Ta’kidlanishicha, davlat muassasalarini egallab olishda ishtirok etgan harbiylar As-Samud brigadasining batalyoni tarkibiga kiradi. Ular oldinroq “Liviyada prezidentlik saylovlari bo‘limasligini va Tripolidagi barcha davlat muassasalarini yopishlarini” ma’lum qilgandi.
Ijtimoiy tarmoqlar foydalanuvchilarining ma’lum qilishicha, qurollangan shaxslar infratuzilmaning ahamiyatga ega muhim obyektlarini egallab olgan. Shuningdek, mamlakat g‘arbidagi yirik shaharlarda bir nechta harbiy tuzilmalar jangovar shay holatga keltirilgan.
Sodir bo‘layotgan voqealar fonida Tripolining qator tumanlari elektr energiyasisiz qolgan.
Avvalroq Liviyada feldmarshal Haftar hamda Kaddafining o‘g‘li prezidentlik saylovlariga qo‘yilmasligi mumkinligi to‘g‘risida xabar berilgandi.
2011-yilda Liviya inqilobi yetakchisi Muammar Kaddafi ag‘darilib, qatl etilganidan so‘ng Liviyada yagona boshqaruv organi tuzishga muvaffaq bo‘linmadi. Mamlakatda qo‘sh hukumat o‘rnatildi: bir tomondan Tripolida Birlashgan Millatlar Tashkiloti tan olgan bosh vazir Faiz Sarraj boshchiligidagi Milliy kelishuv hukumati (MKH), boshqa tomondan Haftar tomonidan qo‘llab-quvvatlangan bosh vazir Abdulla Abdurahmon at-Tani boshchiligidagi muvaqqat hukumat. Prezidentlik saylovi 2019-yilning bahorida bo‘lib o‘tishi kerak edi, biroq Xalifa Haftar kuchlarining Tripoliga hujumi tufayli u noma’lum muddatga qoldirildi. Yangi sana Liviya siyosiy muloqot forumi yakunlariga ko‘ra belgilangan edi.
