Ҳиндистон 1 июлдан 19 та тоифадаги бир марталик пластик буюмлар, шу жумладан, стаканлар ва найчалардан фойдаланишни тақиқлади, деб ёзади «Интерфакс».
Ушбу чора-тадбирлар пластикдан фойдаланишни бекор қилиш бўйича давлат режасининг биринчи босқичига айланди. Рўйхатга киритилган буюмларни ишлаб чиқариш, импорт қилиш, сақлаш ва тарқатиш тақиқланади.
Пластик буюмлар ишлаб чиқарувчилари инфляция юқори суръатларда ўсиб бораётган бир пайтда иш ўринлари йўқотилишига йўл қўймаслик учун ҳукуматдан тақиқ жорий этилишини кечиктиришни сўради, бироқ Ҳиндистон ҳукумати уларга рад жавоби берди.
Ҳиндистон ҳукумати маълумотларига кўра, 2020 йилда мамлакатда 4,1 миллион тонна пластик чиқиндилар ҳосил бўлган.
Эслатиб ўтамиз, 2021 йилда Европада бир марталик пластик идишлардан фойдаланиш қатъиян тақиқланди. 2019 йилда қабул қилинган тегишли қонунга кўра, Европа Иттифоқи давлатлари бундай маҳсулотларни бозордан олиб ташлаши ҳамда 2021 йил 3 июлга қадар уларни ишлаб чиқаришни тўхтатиши керак эди. 12 ой ичида мавжуд захираларни сотишга рухсат берилди, аммо шундан кейин тақиқ тўлиқ кучга кирди.
Изоҳ (0)