Мисрнинг Хургада шаҳрида Қизил денгизда сузаётган аёл акула ҳужумига учради, деб ёзади Meduza Al Arabiya нашри ва Россиянинг Мисрдаги бош консулхонасига таяниб хабар берди.
Акула ҳужуми Сахл-Хашиш курорти яқинида юз берган. Оқибатда аёл қўли ва оёғидан айрилган. У касалхонада вафот этган.
Бош консулхонада қайд этилишича, марҳума сайёҳ бўлган. Al Arabiya маълумотларига кўра, гап 68 ёшли Австрия фуқароси ҳақида бормоқда, у сўнгги вақтларда Мисрда доимий яшаб келган.
Акула ҳужумидан кейин Сахл-Хашиш яқинидан Макади-Бей кўрфазигача бўлган ҳудудда чўмилиш, балиқ овлаш ва бошқа сув спорти турлари уч кунга тақиқланди.
«РИА Новости» ёзишича, сўнгги бир неча йиллардан буён маҳаллий ОАВлар Хургада соҳиллари яқинида оқ акулалар фаоллиги ҳақида хабар бермаган эди. 2010 йил декабрида Мисрнинг бошқа курорти Шарм-аш-Шайх яқинида бешта акула дам олаётган сайёҳларга ҳамла қилган эди. Германия фуқароси ҳалок бўлиб, уч россиялик ва бир украиналик жабрланганди.
2020 йилда Мисрнинг Марса-ал-Алам шаҳрида узунқанот акула германиялик турист-дайверга ҳужум қилгани ва аёлнинг чап елкасини тишлаб олгани хабар берилган эди.
Изоҳ (0)