2022 йилнинг биринчи ярим йиллигида дунёнинг 500 нафар энг бадавлат одамлари бойлигининг умумий миқдори 1,4 триллион долларга қисқарди — бу ҳали тарихда кузатилмаган максимум натижа, дея хабар берган Bloomberg.
Агентлик ҳисоб-китобларига кўра ўтган вақт давомида Facebook асосчиси Марк Цукерберг 65,5 миллиард доллар йўқотган, Amazon асосчиси Жефф Безос — 63 миллиард доллар, Tesla ҳамда SpaceX асосчиси Илон Маск — 62 миллиард, Louis Vuitton Moët Hennessy бош директори Бернар Арно 49,3 миллиард доллардан маҳрум бўлган.
Шунга қарамай юқорида қайд этилган миллиардерларнинг ҳаммаси Bloomberg Billionaires Index рейтингида ўз ўрнини сақлаб қолган. Маск 208 миллиард доллар билан биринчи, Безос иккинчи (130 миллиард доллар), Арно учинчи поғонани (129 миллиард доллар) эгаллаб турибди.
2022 йилдаги вазият охирги икки йил давомида кузатилган ҳолатлардан кескин фарқ қилади, 2020–2021 йилларда миллиардерларнинг бойлиги кўпайганди, дейилади Bloomberg таҳлилида. Агентлик уларнинг ушбу даврда янада бойиб кетишига ҳукуматларнинг, турли мамлакатлардаги марказий банкларнинг коронавирус пандемияси шароитида бизнесга имтиёзлар тақдим қилгани билан изоҳлаган.
Изоҳ (0)