30 июнь — Ўзбекистон ёшлари куни. Сўнгги йилларда айни шу кун мамлакатда кенг нишонланиб келяпти, ёшларга қаратилаётган эътибор натижалари сарҳисоб қилинади.
Бу кунда, шунингдек, давлат раҳбарининг тегишли фармони билан бир гуруҳ ёшлар давлат мукофотлари билан тақдирланади. Эътиборга молик жиҳати, жорий йилги байрам арафасида кўплаб қорақалпоғистонлик ёшлар мукофотланди.
Айтиш керакки, президент Шавкат Мирзиёев 2021 йили сайловолди ташрифлар вақтида айнан Қорақалпоғистонда ёшлар билан суҳбатда бўлган. Ушбу суҳбатлар давомида эса қорақалпоқ ёшлари президентга ўз таклифларини бергани эътиборга молик.
Давлат раҳбарининг 2022 йил февраль ойида Қорақалпоғистонга қилган ташрифи давомида президент ҳудудларда асосан ёшлар билан суҳбатлашади. Айни шу ташриф арафасида Мўйноқ туманига ҳам ҳоким ёрдамчиси сифатида ишлаган ёшлардан бири ҳоким этиб тайинланди.
Айни вақтда «Янги Ўзбекистон» боғида турли тадбирлар бўлиб ўтмоқда. Бу сафарги тадбирнинг аввалгиларидан фарқи боғда турли хил павильонлар ташкил қилинган. Хусусан, шахмат павильони, «Заковат» павильони, IT соҳаси бўйича павильон, жадидчилар янги авлоди, ўзбек ва хорижий тиллар павильони, китобхонлик павильони, Бўзатов «Ёшлар овози» павильони, спорт павильони, шунингдек, «Ёш тадбиркорлар ва ҳунармандлар» павильонлари ташкил этилган.
Уларда турли хил тадбирлар бўлиб ўтмоқда. Хусусан, Бўзатов павильонида «Ёшлар овози» танлови якунлари ҳамда ёш ижодкорларни кашф этиш бўйича суҳбатлар уюштириляпти. Бундан ташқари «Ёшлар овози» танлови ғолиблари иштирокида жонли ижрода айтишувлар ўтказилмоқда. Шунингдек, караоке чиқишлари, ўзбек мумтоз қўшиқлари ижроси тадбирлари ҳам бўлиб ўтяпти.
Маълумот учун, бугун бўлиб ўтадиган асосий байрам тадбирида эса бир гуруҳ ёшлар, жумладан, қорақалпоғистонлик ёшлар Шавкат Мирзиёевнинг қўлидан ўз мукофотларини қабул қилиб олади.
Изоҳ (0)