Сиёсатшунос Камолиддин Раббимов Конституциянинг 70—75-моддаларини ўзгартириш таклифи бўйича ўз фикрларини билдириб ўтди.
«Конституциямизнинг 70-75 моддаларини ўзгартириш таклифи, баъзи қорақалпоқ дўстларимизда – қардошларимизда маълум хавотирларга сабаб бўлибди. Мен ҳар доим минтақада интеграция, бирлашув тарафдори бўлганман. Ўзбекистонни Қозоғистон, Тожикистон, Туркманистон ва Қирғизистон билан, қолаверса, Озарбайжон ва Туркия билан стратегик яқинлашуви, иттифоқчилиги, бирлиги тарафдори бўлганман!
Ўзбекистонни давлат тузилмаси, собиқ СССР даврида, онгли равишда зиддиятлар билан расмийлаштирилган эди. Ўзбекистон, ўзбеклар тарихда ҳеч қачон қорақалпоқ жигарларимизга жабр-зулм қилмаган. Аксинча, тарихда қорақалпоқ жигарларимизнинг аждодларига жабр-зулм бўлганда, Хоразм хонлари бу жигарларимизни асраб қолишган эди.
Бугун ҳам Ўзбекистон қорақалпоқ жигарларимиз ўзлигини сақлаб, ривожлантириш йўлидан кетяпти. Биз, бир бир миллат, бир давлатмиз! Таклиф қилинаётган ўзгариш – ушбу бир халқни, қардошликни, жондошликни орасига рахна солиши мумкин бўлган ташқи кучларга фитналар учун имкон бермаслик ниятида бўляпти. Ўзбекистон қорақалпоқ ўзлигига, тилига ва маданиятига босим қилмаган ва қилиш нияти ҳам йўқ!
Постсовет ҳудудида бўлаётган провокацияларни кўриб туриб, бу масалада бирлигимизга қарши бўлган ташқи кучларга имкон бермаслик керак. Асоссиз хавотир олаётган қардошларимизга мурожаатим шуки, глобаллашган дунёда, Ўзбекистон қорақалпоқ ўзлигига, тили ва маданиятига бўлган ҳурмат-эҳтиром, бўлган ва ошиб боради», — деб ёзди Камолиддин Раббимов Telegram’даги ўз каналида.
Изоҳ (0)