Аввал хабар берилганидек, 25 июнь куни Ўзбекистон Конституциясига ўзгартишлар киритиш тўғрисидаги қонун лойиҳаси жамоатчилик муҳокамасига қўйилди.
Унга кўра, Конституцияга киритилаётган муҳим ўзгартишлардан бири мажбурий меҳнат ва болалар меҳнатининг тақиқланиши билан боғлиқ.
«Мажбурий меҳнатдан ва болалар меҳнатининг энг ёмон шаклларидан фойдаланиш тақиқланади ҳамда қонунга биноан жавобгарликка сабаб бўлади» (37-модда).
Президент Шавкат Мирзиёев Конституциянинг 29 йиллигига бағишланган байрам тадбирида йўллаган табригида асосий қонунга тўққизта йўналишда ўзгартиришлар киритишни таклиф қилган ҳолда, Конституцияда болалар меҳнатига йўл қўймаслик масаласини алоҳида йўналиш сифатида қайд этдилар.
Ушбу таклиф 20 июнь куни Конституциявий комиссия аъзолари билан учрашуви доирасида ҳам такрор янгради. Шунингдек, Янги Ўзбекистон тараққиёт стратегиясининг мамлакатда янги иш ўринлари яратиш, аҳоли даромадларини ошириш ва шу орқали 2026 йил якунига қадар камбағалликни камида 2 бараварга қисқартиришга бағишланган 85-мақсади доирасида «норасмий ишлаётган 2,5 миллион нафар фуқаронинг бандлигини легаллаштиришга ёрдам бериш орқали уларда ижтимоий кафолат ва имтиёзлардан тўлиқ фойдаланиш имкониятини яратиш» вазифалари белгиланган.
Ўзбекистонда болаларнинг мажбурий меҳнати тугатилгани ҳақида халқаро ҳамжамият томонидан эътироф этилгани жуда муҳим аҳамиятга эга. Ўзбекистон қўшилган ХМТ «Болалар меҳнатининг энг ёмон шакллари тўғрисидаги» 182-сон-Конвенциянинг нормаларининг ижроси таъминланди. 2019 йилнинг 1 апрель куни Брюссель шаҳрида эълон қилинган Халқаро меҳнат ташкилотининг ҳисоботида Жаҳон банки томонидан Ўзбекистон пахта саноатида болалар ва мажбурий меҳнатдан тизимли фойдаланишга барҳам берилгани эътироф этилди.
Ўзбекистон Республикаси «Бола ҳуқуқлари кафолатлари тўғрисида»ги қонунида, шунингдек, Меҳнат кодексида, Маъмурий жавобгарлик тўғрисидаги кодексда болалар меҳнатини тақиқловчи нормалари мустаҳкамланган.
Киритилаётган ўзгартириш ёки қўшимчалар барча меҳнаткашларнинг меҳнат шароитларини яхшилаш учун ҳуқуқий асос бўлади. Энг муҳими, норасмий меҳнат муносабатларини легаллаштиришга имкон яратилади.
Изоҳ (0)