Ижтимоий тармоқларда Фарғонада бир нечта шахс ўзаро жанжаллашаётгани акс этган видео тарқалди. Мазкур ҳолат юзасидан Фарғона вилояти ИИБ ахборот хизмати «Дарё»га маълумот берди.
Маълум қилинишича, жорий йилнинг 26 июнь куни фуқаро Д.Т. 102 қисқа рақамига қўнғироқ қилиб, фуқаро Б.Т.ни бир нечта қўшнилари уриб, тан жароҳати етказгани ҳақида хабар берган. Хабар тегишли тартибда рўйхатга олиниб, ўрганиш ишлари олиб борилган.
Аниқланишича, жорий йилнинг 22 июнь куни Риштон тумани «Янги авлод» маҳалла фуқаролар йиғини Арчазор кўчаси 121-уй олдидаги соя жойга фуқаролар Ж.Н. ва Ф.С. Damas автомашинасида келиб тўхтаган. Шу жойдаги савдо дўкони эгаси Б.Т. уларга машинани бу ерга қўймасликни айтган. Натижада ўзаро келишмовчилик сабабли жанжал келиб чиққан. Ушбу жанжалга Ф.С.нинг 7 нафар таниши ҳам аралашган.
Ҳозирда тан жароҳати етказилганига аниқлик киритиш юзасидан судга оид тиббий экспертиза тайинланиб, Риштон туман ИИБ томонидан терговга қадар текширув ҳаракатлари олиб борилмоқда.
Изоҳ (0)