Жангари фильмлари орқали бутун дунёга танилган актёр Жеки чан кинога кириб келганининг 60 йиллигини нишонлади. У ўзи рол ижро этган фильмлардаги парчаларини йиғиб, мухлисларига қўллаб-қувватлов учун миннатдорчилик билдирган.
Жеки Чан ўзининг тиришқоқлиги ва қатъияти билан кўплаб экшн-саҳналарни яратишга муваффақ бўлган. Хусусан, «Полициячилар тарихи» фильмида Чан ўнлаб метр баландликдан шифтдаги чироқларга уланган электр симидан осилиб тушгани тасвирланган саҳна бор — ўта хавфли бўлган мазкур трюкни актёрнинг ўзи бажарган.
«Мазкур фильмдаги чироқлар симидан пастга осилиб тушиш саҳнаси дублёрсиз олинган. Ҳар сафар пастга қараганимда ўлиб қолсам керак деб қўрқардим, чунки олдин аварияга учраб, бундан ҳиссиётни бошдан кечирганман. Кўриб турганингиздек, ‘Полициячилар тарихи’да бақириб сакраганман, чунки мени ўлдиришлари мумкинлигини билардим ва иккала қўлим ҳам оқибатда кесилиб кетганди», — дейди Чан.
Меҳнатсевар Жеки Чан, шунингдек, кўплаб ёш актёрларнинг тақдирига ҳам таъсир кўрсатган. «Янги полициячилар тарихи» фильмини суратга олиш жараёнида Чан билан ҳамкорлик қилган хитойлик актёр Николас Сзе Тин-Фунгнинг сўзларига кўра, у доим Жеки Чандан илҳомланган ва унинг изидан борган.
Узоқ йиллар давомида суратга тушиш асносида Жеки Чаннинг танасида кўплаб чандиқлар қолган, қўл-оёқлари бир неча бор синган. Актёр ўзини 60 йилдан буён қўллаб-қувватлаб келаётган мухлисларига миннатдорчилик билдириб, юртида бўлаётган ўзгаришларни кўраётганидан фахрланишини билдирган.
Изоҳ (0)