Иорданиянинг Қизил денгиз соҳилларида жойлашган Акаба порт шаҳрида газсимон хлор сизиб чиқиши оқибатида ўн нафар одам ҳалок бўлди ва 251 кишига талафот етди. Бу ҳақда шаҳар маъмурияти маълумотларига таяниб The National хабар қилган.
Жамоат хавфсизлигини таъминлаш бошқармаси газ контейнерининг кран бузилиши оқибатида транспортировка жараёнида ерга қулагани ва герметикаланган деворлардан газ сизиб чиқа бошлаганини билдирган. ОАВ контейнернинг юк машинасидан кўтариб олингани, аммо уни кемага ортиш вақтида авария юз бергани акс этган видеони эълон қилган. Кемани сариқ булут қоплаб олган.
Иордания ҳукумати газнинг тури ҳақида аниқ маълумот бермаган, аммо ОАВ сизиб чиққан модданинг хлор эканлигини ёзган. Контейнерда экспорт учун мўлжалланган 25 тонна газ бўлган.
Акаба аҳолисига ёпиқ бинолардан ташқарига чиқмаслик, эшик ва деразаларни топиб ўтириши тавсия этилган. Шаҳардаги пляжлар ёпилган, соҳил яқинига кемалар жойлаштириш тўхтатилган, авария оқибатлари бартараф этилмоқда.
Иордания бош вазири Бишер Ал-Ҳасанвеҳ мамлакат ички ишлар вазирига авария сабабларини тафтиш қилиш бўйича топшириқ берган.
Ҳодиса юз берган ҳудуд Исроилнинг Эйлат шаҳри жойлашган бўғоздан 20 километр узоқликда жойлашган. Акабада 188 минг, Эйлатда эса 50 минг аҳоли истиқомат қилади.
Изоҳ (0)