Юрий Шатуновнинг ўлимидан кейин жиноят иши қўзғатилгани ҳақидаги хабарлар рад этилди

«Ласковий май» гуруҳи собиқ яккахони Юрий Шатуновнинг вафоти муносабати билан жиноят иши қўзғатилгани тўғрисидаги маълумот ҳақиқатга тўғри келмайди, дея хабар берди Россия Тергов қўмитасининг Москва вилояти бўйича бошқармаси.

Қўшиқчига ўз вақтида ёрдам кўрсатмаган тез ёрдам шифокорларига қарши жиноий иш қўзғатилгани ҳақида Шатуновнинг директори Аркадий Кудряшов «Комсомольская Правда» нашрига маълум қилган эди. «Бизга тез ёрдам бригадаси юборилди, у ускуналарга эга бўлмаган қадимий ‘Газель’ эди. Юрани касалхонагача етказиб бора олмадик, у йўлда вафот этди. Касалхонада уни жонлантиришга уринишди, аммо бўлмади», — деди Кудряшов.

«РБК» нашрига берган интервьюсида эса Шатуновнинг директори тез ёрдам шифокорларига нисбатан норозилиги йўқлигини, чунки улар томонидан «қўпол қонун бузилишлари» бўлмаганини айтганди.

Кейинроқ Кудряшов «РБК»га шифокорларга нисбатан жиноий иш қўзғатилгани ҳақида унда маълумот бўлмаганини айтди. «Шундай масала кўтарилди: ‘шифокорларга норозилигингиз борми?’ Мен, норозилигим йўқ дедим. Қолган ҳаммаси, хайп», — дея қўшиб қўйди Кудряшов.

Шатунов 23 июнга ўтар кечаси вафот этди. Подмосковьедаги Растуново қишлоғида дўстлари билан ҳордиқ чиқараётган пайтда унинг мазаси қочган. У юрак хуружи билан касалхонага оғир аҳволда етказилган. Домодедово марказий шаҳар касалхонаси бош шифокори Андрей Осипов қўшиқчига тез ёрдам шифокорлари шошилинч ёрдам кўрсатишни бошлаганини, аммо Домодедово касалхонаси қон-томир марказига у клиник ўлим ҳолатида келиб тушганини айтди. Унинг сўзларига кўра, бир ярим соат давомида бир нечта реаниматолог-кардиологлар ва неврологлар мусиқачининг ҳаёти учун курашган.

Қўшиқчи билан видолашув маросими 26 июнь куни бўлиб ўтди. Дафн маросими 28 июнга белгиланган. Шатуновнинг вакилига кўра, қўшиқчи кремация қилинади, хокининг бир қисми эса у узоқ йиллар яшаган Германияда дафн қилинади.