Туркия Марказий банки лирани асосий фоиз ставкасини оширмасдан туриб қўллаб-қувватлаш мақсадида молия институтларига ҳисоб рақамида катта миқдордаги хорижий валюта бўлган компанияларга лирада кредит беришни тақиқлади. Ушбу қарорга натижасида, лира 27 июнь куни барқарор равишда қимматлашяпти, дея хабар берди Bloomberg.
Марказий банк 24 июнь куни бозорлар ёпилганидан сўнг лирани қўллаб-қувватлаш чораларини эълон қилди. Банклар чет эл валютасидаги ҳисоби 15 миллион лирадан (тахминан 900 минг доллар) ошган ва ушбу сумма жами активлари ёки йиллик сотиш ҳажмининг 10 фоизидан ортиғини ташкил қилган компанияларга лирада кредит бера олмайди. Умуман олганда, янги қоида ўн мингга яқин компанияга таъсир қилади, чунки унда бир қатор истиснолар мавжуд, дея таъкидлайди Bloomberg манбаси.
Регуляторнинг бундай қарори компанияларни лирада янги кредитлар олиши учун хорижий валютани сотишга мажбур қилиши кутилмоқда. Янги чоранинг таъсири «қаттиқ» бўлади, бироқ у қисқа муддатда, йирик экспортчи компаниялар ўз балансларини хорижий валютада қисқартиргандагина намоён бўлади, дейди Deutsche Bank иқтисодчилари.
Шунингдек, кўпчилик экспертларнинг фикрича, инфляция 70 фоиздан ошган шароитда Туркия Марказий банки асосий фоиз ставкасини оширмасдан туриб, лирани узоқ вақтга мустаҳкамлай олмайди.
Изоҳ (0)