Таэквондо бўйича Ўзбекистон терма жамоаси Осиё чемпионатида тарихий натижа қайд этди

Жанубий Кореяда таэквондо WТ бўйича XXV Осиё чемпионати ўз якунига етди.

27 июнь кунги баҳсларда -80 кг вазн тоифасида иштирок этган ўзбекистонлик Шуҳрат Салаев қитъа чемпионлигини қўлга киритди.

Салаев финалда Токио—2020 Олимпиадаси кумуш медал соҳиби иорданиялик Солиҳ аш-Шарабати билан тўқнаш келди ва рақибини мағлуб этди.

Салаевдан ташқари Улуғбек Рашидов, Жасурбек Жайсунов ва Никита Рафалович ҳам олтин медални қўлга киритганди. Шу тариқа Ўзбекистон терма жамоаси мазкур қитъа биринчилигини 4 та олтин, 1 та кумуш ва 2 та бронза медали билан якунлади. Аҳамиятли томони, эркаклар терма жамоаси 4 та олтин медал билан мусобақа мезбонларини ортда қолдириб, умумжамоа ҳисобида биринчи ўринни эгаллади. Қайд этиш керак, Ўзбекистон Осийи чемпионатида илк бор 4 та олтин медал қўлга киритди.

Шунингдек, терма жамоа аъзолари турли номинацияларда ғолиб деб топилди. Жасурбек Жайсунов «Энг яхши спортчи», Ўзбекистон терма жамоаси устози Павел Хан «Энг яхши мураббий», Ўзбекистон терма жамоаси эса «Энг яхши жамоа» номинациялари соҳибига айланди.