DDoS ҳужумлари Литва давлат солиқ инспекцияси, аэропортлар ва Ташқи ишлар вазирлигининг веб-сайтларини бузди. Масъулиятни Литвадан Калининград вилояти транзитига қўйилган блокада олиб ташлашни талаб қилган Killnet гуруҳи ўз зиммасига олди. Бу ҳақда LRT нашри ёзди.
Бошқалар қаторида Литва давлат солиқ инспекцияси (ДСИ) сайти ҳам ишламай қолган. Идоранинг хабар беришича, улар ўзларининг ахборот тизимларидаги ишини «одатий даражадагидан юқори уланишлар оқими» қайд этилганидан кейин тўхтатган. ДСИ мижозлар маълумотлари хавфсизликда эканлигига ишонтирган, деб ёзади LRT. Ҳужум туфайли паспорт ва прописка беришда ҳам носозликлар кузатилмоқда, телефон хизматларини бажариб бўлмаяпти.
«Литва аэропортлари» ва бизнесни бошқариш тизимларини ўрнатиш ва техник хизмат кўрсатиш бўйича фаолият юритувчи BSS компанияси сайтида ҳам носозликлар юз берган. BSS бунга DDoS ҳужумлари сабаб бўлганлигини тасдиқлаган.
Москва вақти билан соат 15:50 ҳолатига кўра, ДСИ, «Литва аэропортлари» ва мамлакат ТИВ сайтлари ишламай қолган. BSS веб-сайтига эса кириш мумкин бўлган.
Ҳужум учун жавобгарликни Россияга алоқадорлигини даъво қилувчи Killnet хакерлик гуруҳи ўз зиммасига олди. 25 июнь куни кечқурун Killnet видеомурожаат йўллаб, унда Литва ҳукуматига мурожаат қилган.
Хакерлар агар Вильнюс Калининградга юк транзитини очмаса, мамлакат ахборот тизимларига ҳужум уюштиришларини айтган.
Изоҳ (0)