Ўтган ҳафта Осиё минтақасидан Европага жўнатилган кўмирнинг бир тоннаси 421 долларга сотилган, бу Осиё кўмир экспорти учун рекорд кўрсаткичдир. Бу ҳақда Bloomberg хабар берди.
Энергия нархининг ошиши муқобил энергия етказиб берувчиларининг йўқлиги ва Осиёдаги жазирама туфайли электр энергиясига талабнинг ортиши билан изоҳланади.
IHS Markit индексига кўра, Австралиянинг Ньюкасл портида бир тонна кўмир нархи 402,5 долларга етиб, биринчи марта тоннаси учун 400 доллардан ошган.
Осиё ва Европадаги электр энергияси ишлаб чиқарувчилари камайиб бораётган табиий газ захиралари ўрнига қўшимча кўмир етказиб бериш учун, тоғ-кон саноати корхоналари эса ишлаб чиқариш ҳажмини ошириш учун курашмоқда, — дея таърифлайди агентлик бозордаги вазиятни.
Кўмир нархи ошиши уй хўжаликлари учун электр энергияси нархининг ошишига ва камбағал мамлакатларда ресурс танқислигига сабаб бўлиши мумкин.
Шунингдек, кўмирга бўлган талабнинг ортиши атроф-муҳитга салбий таъсир кўрсатади, чунки кўмир энг «ифлос» энергия манбаларидан бири бўлиб, ҳозирги шароитда бир қатор Европа ва Осиё давлатларининг экологик стратегияларига зид келади.
Аввалроқ бутун дунё кўмирдан воз кечаётган бир пайтда Ўзбекистон уни ишлаб чиқаришни ошираётгани ҳақида хабар берилганди.
Изоҳ (0)