ЖССТ Фавқулодда вазиятлар қўмитаси маймунчечакнинг сўнгги авж олиши халқаро аҳамиятга молик фавқулодда ҳолат (PHEIC — Public Health Emergency оф International Cонcерн) эмас, деган хулосага келди. Қўмита ташкилот раҳбари Тедрос Гебрейесусга касалликни бундай деб тан олмасликни тавсия қилди. Гебрейесус тавсияни қабул қилади, дейилади ЖССТ баёнотида.
«Баъзи аъзолар турли фикрларни билдирган бўлса-да, қўмита консенсус орқали ЖССТ бош директорига ушбу босқичда эпидемия PHEIC’ни ташкил этмаслиги кераклиги ҳақида маслаҳат беришга қарор қилди», — дейилади ташкилот баёнотида.
PHEIC — 2005 йилдаги Халқаро соғлиқни сақлаш қоидаларига мувофиқ аҳоли саломатлиги учун хавфлиликнинг энг юқори даражасидир. ЖССТ COVID-19 пандемиясининг бошида ушбу даражани эълон қилган.
Шу билан бирга, қўмита маймунчечакнинг ҳозирги авж олиши кўп жиҳатдан ғайриоддий эканини, жумладан чечакнинг бу тури илгари қайд этилмаган мамлакатларда ҳам борлигини таъкидлади.
«Қўмита аъзоларидан айримлари аҳолининг чечакка қарши иммунитети пастлигини ҳисобга олиб, касаллик аҳоли орасида янада барқарор тарқалиши мумкинлигини ва буни эътибордан четда қолдирмаслик кераклигини билдирди», — дейилади баёнотда. Қўмита, шунингдек, кўп йиллар давомида Африкада маймунчечак вирусининг тарқалишига эътибор берилмагани ва касаллик ёмон назорат қилинганини таъкидлади.
Қўмита вирус тарқалишига қарши курашда интенсив чоралар кўриш мақсадида вазиятнинг фавқулодда хусусиятини бир овоздан тан олди.
Изоҳ (0)