Афғонистонга навбатдаги инсонпарварлик ёрдами юборилди

Афғонистонда 22 июнга ўтар кечаси юз берган 6,1 магнитудали зилзила оқибатида 1,5 минг киши ҳалок бўлгани, 2 минг киши жароҳатланган, минглаб иншоотлар вайрон бўлгани тўғрисида хабар берилганди.

Зилзила оқибатида жабр кўрганларга ёрдам кўрсатиш мақсадида Ўзбекистон президенти Шавкат Мирзиёев топшириғига биноан Афғонистонга навбатдаги инсонпарварлик ёрдами юборилди. Бу ҳақда Ташқи ишлар вазирлиги расмий вакили маълум қилди.

Маълум қилинишича, озиқ-овқат маҳсулотлари, бирламчи зарур предметлар ва медикаментлардан иборат жами 74 тонна юк ортилган самолёт Афғонистонга жўнаб кетган.

Алоҳида қайд этилганидек, Афғонистондаги даҳшатли фожиадан сўнг зудлик билан кўрсатилган ёрдам минглаб оддий афғонлар ҳаётини сақлаб қолишга хизмат қилади.

Ўзбекистон ва Афғонистон халқлари ўртасидаги чуқур тарихий-маънавий, маданий-гуманитар алоқаларни таъкидлар экан, Афғонистон Муваққат ҳукумати ахборот ва маданият вазири в.б. Хайрулла Хайрхва мамлакат ҳукумати ушбу ришталарни янада ривожлантиришга интилаётганини таъкидлади.

«Ўзбек замини хазиналари саналмиш қадимий Самарқанд ва Бухоро ислом маданияти марказлари бўлиб келган ва шундай бўлиб қолади, уларни, жумладан, бутун афғон халқи эъзозлайди.

Ишончимиз комилки, Ўзбекистоннинг бундай чинакам самимий кўмаги қардошлик ришталаримизни янада мустаҳкамлаш, халқларимиз ва мамлакатларимиз ўртасидаги яқинлашувга хизмат қилади», — деди Афғонистон маданият ва ахборот вазири.

Ўзбекистон Президентининг Афғонистон бўйича махсус вакили Исматулла Иргашев Афғонистонга кўрсатилаётган бу ёрдамнинг биродарлик хусусиятига эга эканини таъкидлар экан, унинг инсонпарварлик мазмунига тўхталди.Гуманитар юкларнинг Афғонистон халқига етказилиши «афғон халқи учун энг оғир дамларда ҳам афғон заминида доимо тинчлик ва фаровонлик ҳақида ўйлайдиган» Ўзбекистон Президентининг шахсий ташаббуси эканлиги таъкидланди.

Ўзбекистоннинг 30 апрель куни Рамазон муносабати билан Афғонистонга юборган гуманитар ёрдами 58 та вагондан иборат эди. Ундан аввал 2021 йилнинг декабрьва сентябрьойларида афғон халқи учун инсонпарварлик юки етказилган.