Фарғона вилояти Боғдод туманида гиёҳванд моддасини сақлаб келган қоровул қўлга олинди.
14 июнь куни туман ИИБ ЖҚБ ходимлари томонидан ўтказилган тадбир давомида, боғдорчилик фермер хўжалиги дала шийпонида қоровулчилик билан шуғулланувчи К.О. истеъмол қилиш учун қоровулхона томида 451 грамм «Марихуана» гиёҳвандлик моддасини сақлаб келаётгани аниқланиб, ашёвий далил тариқасида олинган.
Мазкур ҳолат юзасидан Бағдод тумани ИИБ ҳузуридаги тергов бўлими томонидан Жиноят кодексининг 276-моддаси 2-қисми (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) билан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, Жиноят кодексининг 276-моддаси 2-қисмида кўрсатилган жиноятни содир этган шахс 3 йилгача озодликдан маҳрум қилиш билан жазоланиши мумкин.
Изоҳ (0)