АҚШ Сенати қурол назорати тўғрисидаги қонун лойиҳасини маъқуллади

АҚШ Сенати қуролли зўравонликка қарши кураш тўғрисидаги қонун лойиҳасини қабул қилди, деб ёзмоқда CNN телеканали.

Қонун лойиҳасини ёқлаб 65 сенатор овоз берган, 33 нафари эса қарши чиққан. «15 нафар республикачи ушбу чорани қўллаб-қувватлаш учун демократларга қўшилди, бу мамлакатнинг энг мунозарали сиёсий масалаларидан бири бўйича икки партиявий ютуқни кўрсатади», — дейилади CNN хабарида.

Ҳужжат яқинда Техаснинг Ювалда шаҳридаги бошланғич мактабда ҳамда Нью-Йоркнинг Буффалo шаҳридаги супермаркетда ўнлаб кишиларнинг ўлимига сабаб бўлган отишмалардан сўнг қабул қилинган эди.

Энди қонун лойиҳаси Вакиллар палатаси томонидан маъқулланиши керак, шундан сўнг у имзолаш учун президент Жо Байденга юборилади.

Май ойида New York Post газетаси Gun Control Violence веб-сайти маълумотларига таяниб, «2022 йилда Қўшма Штатлардаги оммавий отишмалар сони аввалги йилдаги кўрсаткичлар сонидан ошиб кетгани» ҳақида хабар берди.

Ҳисоботда айтилишича, жорий йилнинг 144 кунида мамлакатда 214 та отишма қайд этилган.