Юрий Шатуновга чақирилган тез ёрдам келмаган, натижада 40 дақиқа вақт йўқотилган — ОАВ

Россиялик қўшиқчи Юрий Шатуновга чақирилган тез ёрдам келмаган, натижада 40 дақиқа вақт йўқотилган, деб ёзади «Известия» ўз манбасига таяниб.

23 июнь куни «Ласковий май» гуруҳи яккахони Юрий Шатунов 48 ёшида вафот этди, унинг ўлимига ўткир юрак етишмовчилиги сабаб бўлди.

Нашр манбасига фикрича, тез ёрдамга қўнғироқ бўлганидан кейин барча ҳаракатлар иш тартибига мувофиқ амалга оширилганида Шатуновни 60 фоизлик эҳтимол билан қутқариб қолиш мумкин бўларди.

Манбага маълум бўлишича, Шатуновнинг дўстлари диспетчерга 22 июнь куни 23:27 да қўнғироқ қилган ва «одамнинг юраги ёмон бўлаётгани»ни айтган. Уларга машиналар йўқлигини айтиб, тез ёрдам юборишни рад этишган.

Шатуновнинг дўстларига аёл киши жавоб берган. Ахлоқий нуқтаи назардан манба унинг исмини ошкор қилмади. Шу билан бирга, маълум бўлишича, қўнғироқларга бундай муносабат ушбу подстанцияда аввал ҳам кузатилган.

Таъкидланишича, диспетчер вазиятнинг жиддийлигини аниқлаштириш ва зарур бўлса, энг яқинда турган бригадани йўналтириши, бунинг учун эса қўшимча саволлар бериши керак эди. Аммо у бундай қилмаган, оқибатда Шатуновнинг директори ва дўстлари уни касалхонага ўзлари олиб борган.

Аввалроқ қўшиқчининг ўлимидан олдинги сўнгги ҳолати тасвирланган видео ижтимоий тармоқларда тарқалди. Видеода қўшиқчининг дўстлари уни яқин орадаги касалхонага олиб келишгани акс этган. Ҳолдан тойган ва ўзи юра олмаётган Шатуновни дўстлари елкасига кўтариб олган. У ердан Шатунов тез ёрдам машинасида Домодедово касалхонасига олиб кетилаётганда вафот этган.