Rossiyalik qo‘shiqchi Yuriy Shatunovga chaqirilgan tez yordam kelmagan, natijada 40 daqiqa vaqt yo‘qotilgan, deb yozadi “Izvestiya” o‘z manbasiga tayanib.
23-iyun kuni “Laskoviy may” guruhi yakkaxoni Yuriy Shatunov 48 yoshida vafot etdi, uning o‘limiga o‘tkir yurak yetishmovchiligi sabab bo‘ldi.
Nashr manbasiga fikricha, tez yordamga qo‘ng‘iroq bo‘lganidan keyin barcha harakatlar ish tartibiga muvofiq amalga oshirilganida Shatunovni 60 foizlik ehtimol bilan qutqarib qolish mumkin bo‘lardi.
Manbaga ma’lum bo‘lishicha, Shatunovning do‘stlari dispetcherga 22-iyun kuni 23:27 da qo‘ng‘iroq qilgan va “odamning yuragi yomon bo‘layotgani”ni aytgan. Ularga mashinalar yo‘qligini aytib, tez yordam yuborishni rad etishgan.
Shatunovning do‘stlariga ayol kishi javob bergan. Axloqiy nuqtai nazardan manba uning ismini oshkor qilmadi. Shu bilan birga, ma’lum bo‘lishicha, qo‘ng‘iroqlarga bunday munosabat ushbu podstansiyada avval ham kuzatilgan.
Ta’kidlanishicha, dispetcher vaziyatning jiddiyligini aniqlashtirish va zarur bo‘lsa, eng yaqinda turgan brigadani yo‘naltirishi, buning uchun esa qo‘shimcha savollar berishi kerak edi. Ammo u bunday qilmagan, oqibatda Shatunovning direktori va do‘stlari uni kasalxonaga o‘zlari olib borgan.
Avvalroq qo‘shiqchining o‘limidan oldingi so‘nggi holati tasvirlangan video ijtimoiy tarmoqlarda tarqaldi. Videoda qo‘shiqchining do‘stlari uni yaqin oradagi kasalxonaga olib kelishgani aks etgan. Holdan toygan va o‘zi yura olmayotgan Shatunovni do‘stlari yelkasiga ko‘tarib olgan. U yerdan Shatunov tez yordam mashinasida Domodedovo kasalxonasiga olib ketilayotganda vafot etgan.
Izoh (0)