23 июнь куни Сенатнинг Ёшлар, маданият ва спорт масалалари қўмитаси мажлисида кинематографияни ривожлантиришнинг устувор йўналишларида белгиланган вазифалар ижроси юзасидан Кинематография агентлиги бош директори ахбороти эшитилди. Бу ҳақда парламент юқори палатаси матбуот хизмати хабар берди.
Мажлисда агентлик томонидан ушбу йўналишда муайян ишлар амалга оширилгани қайт этилган. Хусусан, 2019-2021 йилларда жами 300 та кино маҳсулоти (63 та бадиий, 126 та ҳужжатли фильм, 10 та сериал, 24 та мультфильм, ёш кино ижодкорлари иштирокидаги 60 та қисқа метражли фильм, 3 та болалар юмористик киножурнали, 14 та видеоролик) яратилган.
Муҳаммад Имом Исо Термизий, Ҳаким ат-Термизий, Хожа Баҳоуддин Нақшбанд, Абдулҳолиқ Ғиждувоний, Абу Муъин Насафий, Абдураҳмон Жомий, Алишер Навоий тўғрисида ҳамда яқин ўтмишимиздан ҳикоя қилувчи «Исломхўжа», «Қўқон шамоли», «Авлоний» номли бадиий ва ҳужжатли фильмлар суратга олинган.
Хорижий давлатларда «Ўзбек киноси кунлари» ташкил қилиниб, унда «Рангсиз тушлар», «Илҳақ», «Ибрат», «Тутқунлик» каби фильмлар намойиш этилган. Ҳудудларда кино ижодкорлари иштирокида фильмлар намойишини назарда тутувчи «Кинокарвон» акциялари ўтказилган.
Мажлисда амалга оширилган ишлар билан бир қаторда белгиланган вазифалар ижросини таъминлашда камчиликларга ҳам йўл қўйилгани қайд этилган.
Жумладан, «Кинематография тўғрисида»ги қонун лойиҳаси белгиланган тартибда Қонунчилик палатасига киритилмаган. Кинематография соҳасида мутахассис кадрлар тайёрлаш, қайта тайёрлаш ва уларнинг малакасини оширишга ихтисослаштирилган Ўзбекистон кинематография академияси ҳамда унинг қошида фильмлар ижодий гуруҳи иккинчи таркиб мутахассисларини тайёрлашга ихтисослашган ўрта махсус таълим муассасалари ташкил этилмаган. Республика ҳудудларида замонавий кинотеатрлар тармоғини барпо этиш ишлари якунига етказилмаган.
Бундан ташқари, агентликнинг ҳудудий бўлимлари моддий-техник базаси маънан эскирган, тўлиқ фаолият олиб бориши учун зарур шароитлар яратилмаган. Ушбу бўлимларда киномаркетинг йўлга қўйилмаган. Кинематография соҳасида қароқчиликка қарши курашиш, муаллифлик ҳуқуқларини ҳимоя қилиш, телеканаллар, Интернет веб-ресурслари ва платформалар орқали фильмлар намойишларини тартибга солиш, рағбатлантириш ва жазолаш механизмларини амалиётга жорий этиш ишлари якунига етказилмаган.
Шунингдек, оригинал кино маҳсулотларидан ноқонуний фойдаланиш ҳамда контрафакт кино маҳсулотларини тарқатиш, маҳаллий телеканалларда хорижий ва миллий кино маҳсулотларини ноқонуний намойиш этишга қарши курашиш бўйича ҳаракатлар режаси тасдиқланмаган. Миллий кинематографияни ривожлантириш маркази ҳузурида Ахборот мултимедиа стриминг платформаси фаолияти йўлга қўйилмаган. Республикада фаолият юритаётган кинотеатрларни давлат тилига дубляж қилинган хорижий фильмлар билан таъминлаш тизими жорий этилмаган.
Мажлис давомида қайд этилган муаммоларни бартараф этиш юзасидан ҳукумат вакиллари ҳамда вазирлик-идоралар масъулларига тегишли вазифалар белгилаб берилган. Мажлис сўнгида қўмитанинг тегишли қарори қабул қилинган.
Эслатиб ўтамиз, март охирларида Сенат қўмитасида Озодбек Назарбеков раҳбарлик қилаётган вазирлик танқид қилинганди.
Мавзуга доир:
Изоҳ (0)