Ижтимоий тармоқларда Қорақалпоғистон Республикасининг Чимбой туманида IT танлови ғолибига «Пилот» (удлинител) совға қилингани ва бу кулгига олингани ҳақида хабарлар тарқалганди. Ёшлар ишлари агентлиги директори Алишер Саъдуллаев мазкур ҳолат назоратга олиниб, ғолиблар қайта тақдирланганини маълум қилди.
«Чимбойда IT танлови бўйича вазиятни дарҳол шахсан назоратга олиб, ғолибларга янги компьютерлар топширилди. Ёшларимиз бу ҳолатдан тушкунликка тушмасликларини сўраб қоламиз. Билимли ёшларимизни ҳамиша қўллаб-қувватлаймиз», — деб ёзади агентлик директори.
Чимбой тумани ҳокимлигининг 20 июнь кунги маълумотига кўра, туманда ёшлар ойлиги доирасида 15—25 ёшли иштирокчилар орасида «IT билимдони» танловининг туман босқичи ўтказилган. Унда 60 нафардан зиёд ёшлар иштирок этган. Танлов якунига кўра, совриндорлар бўлган йигитга «Пилот» ва сертификат берилган.
Эслатиб ўтамиз, январь ўрталарида Самарқанд вилоятининг Нуробод туманида яшовчи ўқувчи «Бир миллион дастурчи» лойиҳасида биринчи ўрин олган ва унга ишлатилган ноутбук совға қилинганди. Кейинроқ IT Парк ҳолатга ғолиб ўқувчига янги компьютер совға қилинганини маълум қилганди.
Изоҳ (0)