Жиззахда газ заправкада «Жигули» портлаб кетди

Жиззах вилояти Шароф Рашидов туманида 23 июнь куни «Жигули»да портлаш содир бўлди. Бу ҳақда вилоят Фавқулодда вазиятлар бошқармаси хабар қилди.

Қайд этилишича, шу куни соат 15:00 ларда Шароф Рашидов тумани «Совунгарлик» маҳалласи ҳудудида жойлашган автомобилларни газ билан тўлдириш компрессор станциясида «ВАЗ-2106» автомобилга ёнилғи тўлдириш жараёнида портлаш содир бўлган.

Ҳодиса оқибатида ҳеч ким жабрланмаган, бошқа транспорт воситаларига зарар етмаган. Портлашда ёнғин келиб чиқмаган, ёнғин-қутқарув бўлинмалари ҳодиса жойига чақирилмаган.

Дастлабки суриштирув натижаларига кўра, «ВАЗ-2106» транспорт воситасидаги носозлик ҳодисага сабаб бўлган.

Ҳозирда суриштирув ишлари давом этмоқда.