Тарих — ҳаёт такрорлардан иборат экани ҳақида сабоқ берувчи энг яхши устоз; ҳар кунлик бу сабоқлардан доим ҳам вақтида ва тўғри хулосалар чиқарилмаса-да, тарих барибир беқиёс устозлигича қолаверади.Ўзбекистон ва жаҳоннинг бундан 90, 60 ва 30 йил аввалги манзарасига ўзбек матбуоти кўзи билан имкон қадар назар солиш ҳам қизиқ, ҳам фойдали кўринди. Ўн йиллар муқаддам айнан бугунги санада нималар бўлган, давр матбуоти улар ҳақида нима деб ёзган, ушбу воқеа-ҳодисаларга жамоатчиликнинг муносабати қандай эди — бари «Кун матбуоти тарихи» рукни материалларида.
90 йил аввал. 1932 йил 24 июнь, жума
Хабар беришларича, Ўзбекистон ҳукумати (Халқ комиссарлари шўроси) ҳукумат раиси Файзулла Хўжаевга бир ярим ойлик «отпуска» беришга қарор қилган. «ХКС раислиги вазифаси раис ўринбосари ўртоқ Каримовга юклатилади», — дейилади «Қизил Ўзбекистон» ахборотида.
Газетанинг ёзишича, 1932 йил ҳолатига Тошкент шаҳрида 18 та олий таълим муассасаси бўлиб, уларда 25 минг талаба бор. «Ҳар бир вуз ҳозирда ўзича адабиёт қидириб, уни таржима қилдириш ва бостириш учун ҳаракат қилмоқда. Бунинг натижасида қизиқ аҳволлар учрамоқдаким, масалан, САХИ агрокимё ва математика китобини таржима қилишга бошлаган бўлса, худди шу китобни SAPI ҳам таржима қилишга бошлади. Бу эса вузлар ўртасида ҳеч қандай алоқа йўқлигини очиқдан-очиқ кўрсатади», — дейилади газетадаги «Юқори мактабларга ерли тилларда китоблар керак. Китоб чиқаришдаги ва таржимадаги ўзбошимчалик бицин» сарлавҳали материалда.
Ҳасанбойдаги «Шарқ ҳақиқати» колхозида чопиқ ишлари «шармандали суръатлар билан» давом этмоқда. «Қизил Ўзбекистон»нинг кўрсатишича, бунга сабаб — «ишга колхозчи эр ва хотин-қизларнинг тўла равишда тортилмаганидир». «Колхознинг раҳбарлари саналган Маҳкам Алиев ва Қодир Шониёзовлар ‘хотин-қизлар ишлай олмайди’ деб, уларни камситиб, хотин-қизларнинг ғайратига ишонмайди», — дейилади «Қизил Ўзбекистон»даги хабарда.
АҚШдаги бўлажак президент сайловида кимлар овоз бера олмайди? «1. Жанубий вилоятлардаги негрлар; 2. Миллий гвардиянинг солдатлари; 3. Ҳарбий ва савдо флотининг ишчилари; 4. Ишсизлар». «Қизил Ўзбекистон»нинг қўшимча қилишича, ишсизлар ва аскарларга бера олмайди, аммо «ошкора кезиб юратурган ва ҳатто полиция ҳимоясидан фойдалана турган Америка ўғрилари (гангстерлари) раисжумҳур сайловида овоз бера олади». Совет газеталари бундан дарғазаб!
60 йил аввал. 1962 йил 24 июнь, якшанба
24 июнь — Совет ёшлари куни:
Журналистлар Тошкент бозорларида рейдлар уюштирган, нарх-навони ўрганган — бундан 60 йил аввал Олой Тошкентнинг энг қиммат бозори бўлмаган экан.
30 йил аввал. 1992 йил 24 июнь, чоршанба
Президент Ислом Каримов Жануби-Шарқий Осиё бўйлаб турнедан қайтган. У Тошкент аэропортида мухбирларнинг саволларига жавоб бераркан, сафар давомида «Андижонда катта автомобиль заводи қуришга келишилгани»ни маълум қилган. «Бу заводда энг замонавий енгил машиналар, микроавтобуслар ва ихчам юк машиналари ишлаб чиқарилади», — деб таъкидлаган Каримов.
Ўзбекистон парламентининг 2 июль куни очиладиган навбатдаги сессияси олдидан газеталар турли масъуллар, мутасаддилардан интервьюлар олмоқда. Масалан, «Халқ сўзи» газетаси мухбири ташқи иқтисодий алоқалар вазири биринчи ўринбосари Содиқ Сафоев билан суҳбатлашган. «Чет эл сармоясининг иқтисодимизга кириб келишига имконият яратилди. Бироқ бу борадаги ишларни қониқарли даражада, деб айта олмайман», — деб таъкидлаган Содиқ Солиҳович.
Ўзбекистон Олий судининг 1992 йил 19 июнь куни бўлиб ўтган пленумида республика ҳукуматига 13 йил (1971—1984 йиллар) давомида раҳбарлик қилган Нормуҳаммад Худойбердиев тўла оқланган.
Келесда ёққан дўл аралаш кучли жала оқибатида сув тошқини юз берган, 500 га яқин хонадон зарар кўрган:
ЎзА ахборотига кўра, «Захариқ ростмана тошиб, темир йўл остидан ўтган қувур торлик қилиб қолди. Тўпланган сув 1,5 метр юқори кўтарилди».
«Халқ сўзи»нинг қўшимча қилишича, офат рўй берган жойга Ўзбекистон бош вазири Абдуҳошим Муталов келган ва «офат оқибатларини тугатишда республика ҳукумати ҳам қараб турмаслигини таъкидлаган».
«Шифо бўлсин» хабаридан иқтибос: «Саодатхон Каримова. Бу исм нафақат Фарғона водийсида, қўшни Қирғизистон, Тожикистон ва Қозоғистонда ҳам таниш. Сабаби, у ўзининг сеҳрли бармоқлари-ю шифобахш нур қудрати билан кўпчиликни дарддан фориғ этмоқда».
Дунёда нима гап? Молдова президенти Мирча Снегурнинг таъкидлашича, «ҳамма нарсани ўз номи билан аташ керак — биз Россия билан жанг қиляпмиз».
«Тошкент оқшоми»нинг ёзишича, Молдовадаги «Бендера шаҳри учун жангларда 200 дан кўпроқ киши ҳалок бўлган... Бу ердаги Тираспол шаҳрида эса 1 минг нафар киши ўлганлиги ва жароҳатланлиги тўғрисидаги хабар тарқатилди».
Мавзуга доир:
Ҳабиб Абдуллаевнинг вафоти, Ўзбекистоннинг қаҳрамон оналари, «ҳалоллик — совет кишисининг фазилати». Ўзбек матбуоти 21 июнда нималар ҳақида ёзган?Ушбу материал ҳуқуқлари муаллифларида сақланган ҳолда эълон қилиш шарти билан «Дарё» интернет-нашрига тақдим этилди
Изоҳ (0)