Конституцияни ислоҳ қилиш бўйича тузилган махсус комиссия бир ойдан камроқ муддат ичида «Ўзбекистон конституциясига ўзгартириш ва қўшимчалар киритиш тўғрисида»ги конституциявий қонун лойиҳаси тайёрланди. Бу ҳақда 22 июнь куни бўлиб ўтган Қонунчилик палатасининг Коррупцияга қарши курашиш ва суд-ҳуқуқ масалалари ҳамда Демократик институтлар, нодавлат ташкилотлар ва фуқароларнинг ўзини ўзи бошқариш органлари қўмиталарининг қўшма йиғилиши якунида ўтказилган брифингда маълум қилинди.
«Амалдаги конституциянинг 83-моддасига мувофиқ, лойиҳа депутатлар томонидан қонунчилик ташаббуси ҳуқуқи асосида қуйи палатага киритилган. Қонун конституциянинг 66 та моддасига 170 дан ортиқ тузатишлар киритишни назарда тутмоқда», — дейди депутат Жаҳонгир Ширинов.
Унинг таъкидланишича, конституцияга киритилаётган ўзгартиришлар «инсон-жамият-давлат» принципига асосланган бўлиб, миллий конституциявий ўзликни акс эттиради ва амалдаги конституциянинг барча бўлимларига туб ўзгартиришлар киритишни назарда тутади.
Қўмиталарнинг қўшма йиғилишида конституциявий қонун лойиҳасини кўриб чиқиш учун киритишга ижобий хулоса берилди. Қайд этилишича, лойиҳага қуйи палата кенгаши ҳам палатада кўриб чиқиш мумкинлиги тўғрисида қарор қабул қилган.
Лойиҳа энди партиялар фракцияси мажлисларида муҳокама қилинади ва якунда Қонунчилик палатасининг ялпи мажлисига биринчи ўқишга киритилади.
«Ялпи мажлисда концептуал жиҳатдан депутатларимиз томонидан кўриб чиқилганидан кейин қонун лойиҳасини умумхалқ муҳокамасига чиқариш ҳақидаги таклифларимиз ҳам тайёрланмоқда. Яъни депутатлар маъқуллагач Бош қонунга ўзгартириш ва қўшимчалар киритишни тасдиқлаш мақсадида референдум ўтказилади», — дейди Жаҳонгир Ширинов.
Орадан 6 кун ўтиб, 26 май куни Комиссиянинг биринчи йиғилиши ўтказилиб, унда асосан ташкилий масалалар кўрилиб, таклифлар билан ишлаш тартиби белгилаб олинганди. Комиссия матбуот хизмати ҳар ҳафтада бир маротаба йиғилиш ўтказилиши таклифлар муҳокама қилиб борилиши айтилганди.
Конституциявий комиссия матбуот хизмати маълумотларига кўра, бугунга қадар комиссия атиги 5 маротаба (шундан биттасида ташкилий масала кўрилган) йиғилиш ўтказган — 26 май, 3 июнь, 10 июнь, 17 июнь. 18 июнда Сенат ва Қонунчилик палатасининг қўшма мажлиси бўлиб ўтган.
20 июнь куни эса Ўзбекистон президенти Шавкат Мирзиёев Конституциявий комиссия аъзолари билан учрашиб, ўзининг таклифларини билдирди.
Мавзуга доир:
- Шавкат Мирзиёев конституцияга «Миранда қоидаси»ни киритишни таклиф қилди
- Шавкат Мирзиёев судланган шахс қариндошларининг ҳуқуқларини чекламасликни конституцияда белгилашни таклиф қилди
- Шавкат Мирзиёев: «Ҳар бир Ўзбекистон фуқароси турар ёки яшаш жойини эркин танлаш ҳуқуқига эга бўлиши шарт»
- Шавкат Мирзиёев: «Суд қарорисиз ҳеч ким уй-жойидан маҳрум қилинмаслиги керак»
Изоҳ (0)