Болгария парламенти ҳукуматга ишончсизлик вотуми киритди

Болгария парламенти коалиция ҳукуматига ишончсизлик вотумини қабул қилиш учун овоз берди. Бу ҳақда Болгария миллий телевидениеси хабар қилди.

Ҳукуматнинг истеъфосини 123 нафар депутат қўллаб-қувватлаган, 115 нафари қарши овоз берган. Қонунга кўра, вотум учун 121 нафар депутатнинг овози етарли.

Ушбу қадамнинг ташаббускорлари собиқ бош вазир Бойко Борисов бошчилигидаги «ГЕРБ» партияси депутатлари бўлди. Маслаҳатлашувлардан сўнг уларга бошқа мухолифатчи кучлар ҳам — «Уйғониш», «Шундай халқ бор» ҳамда «Ҳуқуқ ва эркинликлар ҳаракати» қўшилди.

Ишончсизлик вотуми ортидан бош вазир Кирил Петков бошчилигидаги энг йирик парламент коалицияси «Ўзгаришларни сақлаш»га Вазирлар кенгашини тузишга яна уриниб кўриш учун мандат берилиши керак. Бу муваффақиятсиз тугаган тақдирда, иккинчи мандат «ГЕРБ» партиясига берилади. Агар унинг саъй-ҳаракатлари етарли бўлмаса, учинчи мандатни парламентда кимга топширишни президент Румен Радевнинг ўзи ҳал қилади.

Агар ушбу тартиб-қоидалар натижасида ҳукумат тузилмаса, давлат раҳбари парламентни тарқатиб юбориши, расмий Вазирлар Маҳкамасини тайинлаши ва муддатидан олдин сайловлар эълон қилиши керак.

Болгарияда 2021 йилда парламент сайловлари натижаларига кўра ҳукуматни шакллантириш имкони бўлмагани учун уч марта навбатдан ташқари парламент сайловлари ўтказилди. Ноябрдаги сайловлардан кейингина сиёсатчилар ҳукумат коалициясини тузишга муваффақ бўлди.

Мухолифатчи кучлар коалицион ҳукуматнинг молиявий-иқтисодий курсидан, шунингдек, Шимолий Македонияга нисбатан сиёсатидан норози. Улар мамлакат фуқароларининг қарийб 15 миллиард лева (саккиз миллиард доллар) йўқотишига сабаб бўлган кескин инфляция ҳақида гапирмоқда. Мавжуд вазият туфайли энергетика вазири ва ташқи ишлар вазири ўз лавозимларини тарк этган эди.