Bolgariya parlamenti koalitsiya hukumatiga ishonchsizlik votumini qabul qilish uchun ovoz berdi. Bu haqda Bolgariya milliy televideniyesi xabar qildi.
Hukumatning iste’fosini 123 nafar deputat qo‘llab-quvvatlagan, 115 nafari qarshi ovoz bergan. Qonunga ko‘ra, votum uchun 121 nafar deputatning ovozi yetarli.
Ushbu qadamning tashabbuskorlari sobiq bosh vazir Boyko Borisov boshchiligidagi “GERB” partiyasi deputatlari bo‘ldi. Maslahatlashuvlardan so‘ng ularga boshqa muxolifatchi kuchlar ham — “Uyg‘onish”, “Shunday xalq bor” hamda “Huquq va erkinliklar harakati” qo‘shildi.
Ishonchsizlik votumi ortidan bosh vazir Kiril Petkov boshchiligidagi eng yirik parlament koalitsiyasi “O‘zgarishlarni saqlash”ga Vazirlar kengashini tuzishga yana urinib ko‘rish uchun mandat berilishi kerak. Bu muvaffaqiyatsiz tugagan taqdirda, ikkinchi mandat “GERB” partiyasiga beriladi. Agar uning sa’y-harakatlari yetarli bo‘lmasa, uchinchi mandatni parlamentda kimga topshirishni prezident Rumen Radevning o‘zi hal qiladi.
Agar ushbu tartib-qoidalar natijasida hukumat tuzilmasa, davlat rahbari parlamentni tarqatib yuborishi, rasmiy Vazirlar Mahkamasini tayinlashi va muddatidan oldin saylovlar e’lon qilishi kerak.
Bolgariyada 2021-yilda parlament saylovlari natijalariga ko‘ra hukumatni shakllantirish imkoni bo‘lmagani uchun uch marta navbatdan tashqari parlament saylovlari o‘tkazildi. Noyabrdagi saylovlardan keyingina siyosatchilar hukumat koalitsiyasini tuzishga muvaffaq bo‘ldi.
Muxolifatchi kuchlar koalitsion hukumatning moliyaviy-iqtisodiy kursidan, shuningdek, Shimoliy Makedoniyaga nisbatan siyosatidan norozi. Ular mamlakat fuqarolarining qariyb 15 milliard leva (sakkiz milliard dollar) yo‘qotishiga sabab bo‘lgan keskin inflyatsiya haqida gapirmoqda. Mavjud vaziyat tufayli energetika vaziri va tashqi ishlar vaziri o‘z lavozimlarini tark etgan edi.
Izoh (0)