Россиядаги нефть заводида ёнғин содир бўлди. Унга дронлар ҳужум қилгани айтилмоқда (видео)

Россиянинг Ростов вилоятидаги Новошахтинск нефтни қайта ишлаш заводи 22 июнь куни эрталаб учувчисиз учар қурилма ҳужумига учради, шундан кейин у ерда ёнғин бошланди, деб хабар беради Meduza. Жабрланганлар ҳақида маълумот йўқ.

Ижтимоий тармоқларда дронга ўхшаган учар қурилма заводга қараб учиб келаётганини кўриш мумкин. Шу пайт заводда портлаш содир бўлади. Шот Telegram-канали эълон қилган тасвирларда, даъво қилинишича, дрон бўлакларини кўриш мумкин — корхона яқинида иккита қурилма бўлаклари топилгани айтилмоқда.

«ТАСС»нинг маҳаллий органлардаги манбаси дрон ҳақидаги ахборотни тасдиқлади. «Ёнғин олдидан завод ходимлари Украина дронини пайқаб қолган. У завод конструкциясига келиб урилган, шундан сўнг портлаш ва ёнғин юз берган», — деди у.

Украина ҳукумати Россия нефтни қайта ишлаш заводига зарба берилганини расман тасдиқлагани йўқ.

Новошахтинск заводи вакили корхонадаги ёнғинга «Ростов вилоятининг ғарбий чегараси томондан амалга оширилган террорчилик ҳаракатлари натижасида» иккита учувчисиз учар қурилма берган зарба сабаб бўлганини маълум қилди. Ўз навбатида, минтақа губернатори Василий Голубаев завод ҳудудида учар қурилмалар бўлаклари топилганини тасдиқлади. Завод фаолияти тўхтатилди. Суриштирув тадбирлари олиб борилмоқда.