Чирчиқ шаҳридаги ер аукционда 23 баравар қимматга сотилди

20 июнь куни ўтказилган онлайн аукцион савдоларида бир нечта лотлар сотуви бўлиб ўтди. Бу ҳақда «E-auksion» матбуот хизмати хабар бермоқда.  

Бир кунлик савдолар натижасида бошланғич нархи 24,2 млрд сўм бўлган 944 та савдо объекти 44,9 млрд сўмга реализация қилинди. 

14 та давлат активи сотилган бўлса, 93 таси ижарага берилди. 262 та тадбиркорлик учун ер участкалари сотилди.

Булар орасида Чирчиқ шаҳридаги бошланғич нархи 26,3 млн сўм бўлган 0,21 гектар ер участкаси мактабгача таълим муассасаси қуриш учун ижара ҳуқуқи билан 620,9 млн сўм таклиф берилди. Шу тариқа мазкур лот бошланғич нархига нисбатан 23,6 баробар қимматроққа сотилди. 

Бундан ташқари Тошкент шаҳар, Чилонзор туманидан йиллик ижара ставкаси 10,9 млн сўм бўлган Республика олимпия ва паралимпия захиралари коллежининг бўш турган бино қисми учун 168,6 млн сўмга таклиф берилди.

Бухоро вилояти, Бухоро туманидан бошланғич нархи 60,3 млн сўм бўлган 0,041 гектар ер участкаси кўп қаватли уй-жой қуриш учун ижара ҳуқуқи билан 638,7 млн сўмга сотилди.

Тошкент вилояти, Олмалиқ шаҳридан нархи 7,2 млрд сўм бўлган 4,97 гектар ер участкаси клиникалар, диспансерлар, дорихоналар қуриш учун мулк ҳуқуқи билан 8 млрд сўмга сотилди.

Аввалроқ Фарғонадаги қурилиши тугалланмаган меҳмонхона МИБ томонидан 16,7 млрд сўмга аукционга қўйилгани ҳақида хабар берилганди.