Қашқадарёдаги ташкилот ишчилари уч ойдан бери маош ололмаётганини айтмоқда

«Трансйўлқурилиш» ДУК Қарши филиали ишчилари уч ойдан бери маош ололмаётганини айтмоқда. Бу ҳақда «Дарё»га ишчилар вакили Розиқ Жуманазаров маълум қилди.

Айтилишича, маошсиз қолаётган ишчилар «Трансйўлқурилиш» ДУК Қарши филиалининг ҳайдовчи ва механизаторлари ҳисобланади.

«Уч ойдан бери маош олмаяпмиз. Бизда ҳам оила бор. Бола-чақани боқишимиз керак. Биз ҳам инсонмиз-ку. Нега энди меҳнат қилсак-да, маош ололмасак. Буни кимдир назорат қиладими?», — дейди Розиқ Жуманазаров.

Мурожаатчиларнинг айтишича, уч ойдан бери маошсиз қолаётган ходимлар 60-70 нафарни ташкил қилади.

«Раҳбариятдан маошсиз қолаётганимиз сабабини сўрасак, асосий пуллар солиққа тўланаётганини айтмоқда», — дейди ишчилар.

«Дарё»нинг бу ҳақдаги сўровига жавоб берган «Трансйўлқурилиш» ДУК Қарши филиали раҳбари Тўлқин Бобомуродов ишчилар маошсиз қолаётганини тасдиқлади.

«Ҳақиқатдан ҳам шу муаммомиз бор. Биз одатда вилоят Автомобиль йўллари бош бошқармасига йўл таъмири учун техника ва асфальт берамиз. Президентимизнинг Қашқадарё вилоятидаги GTL заводига ташрифидан аввал Қашқадарё вилояти Автомобиль йўллари бош бошқармасига йўл таъмири учун техникалар ва маҳсулот етказиб берганмиз. Айнан шу иш учун 2-3 миллиард сўм пул олишимиз керак. Аммо вилоят Автомобиль йўллари бош бошқармаси пулларимизни бермаяпти. Биз эса ишчиларга маош тўлолмаяпмиз», — дейди «Трансйўлқурилиш» ДУК Қарши филиали раҳбари Тўлқин Бобомуродов.

Тўлқин Бобомуродовнинг айтишича, вилоят Автомобиль йўллари бош бошқармасининг тумандаги ташкилотлари ҳам улардан қарздор. Аммо пулини ўз вақтида тўлаб бермаяпти.

«Ойига тахминан 300 миллион сўмдан маош берсак, уч ой учун ишчилардан 900 миллион сўм қарздорлигимиз бор», — дейди «Трансйўлқурилиш» ДУК Қарши филиали раҳбари.

Қашқадарё вилоят Автомобиль йўллари бош бошқармаси масъули Файзулла Худойқулов «Дарё» сўровига жавобан GTL заводига олиб борувчи йўл таъмири учун сарфланган 40 миллиард 150 миллион сўм маблағ ҳалигача тўлаб берилмаганини маълум қилди.

«Қачонки шу пуллар республика бюджетидан бизга берилса, биз ‘Трансйўлқурилиш’ ДУК Қарши филиалидаги қарздорлигимизни тўлаб берамиз», — дейди Файзулла Худойқулов.