Шавкат Мирзиёев 19 июнь куни Ҳиндистоннинг шимоли-шарқидаги ҳудудларда юз берган табиий офатлар сабаб мамлакат президенти Рам Натҳ Ковинд ва бош вазир Нарендра Модига ҳамдардлик йўллади. Бу ҳақда президент матбуот котиби хабар қилди.
NDTV агентлигининг маълумотларига кўра, 18 июнь куни Ҳиндистоннинг шимоли-шарқи ва Бангладешда сув тошқинлари юз берган. Оқибатда Ассам ва Мегхалая штатларида камида 62 киши ҳалок бўлган. Ассамдаги 33 та тумандан 32 таси сув остида қолган, 156 мингдан ортиқ киши вақтинчалик яшаш лагерларига кўчиб ўтган. Ёмғир ва кўчкилар камида 230 та йўл ва 16 та кўприкни вайрон қилган.
Эслатиб ўтамиз, Шавкат Мирзиёев 9 июнь куни Эроннинг Жанубий Хуросон музофотида йўловчи поезди фалокатга учраши ва қурбонлар кузатилгани муносабати билан мамлакат президентига ҳамдардлик йўллаган.
Изоҳ (0)