Италияда 44 ёшли эркак тиббий ёрдам орқали ўз жонига қасд қилиш натижасида вафот этди, бу мамлакатда биринчи шундай ҳолат бўлди, деб ёзади Deutsche Welle.
Нашр маълумотларига кўра, Федерико Карбонининг ўлими ҳақида эвтаназияни ёқлаб кампаниялар ўтказувчи Лука Кошиони уюшмаси хабар берган, ушбу гуруҳ унга судларда ва соғлиқни сақлаш органларида ўз ниятига эришишда ёрдам берган.
44 ёшли собиқ юк машинаси ҳайдовчисида 10 йил аввал йўл-транспорт ҳодисаси оқибатида бўйнидан пастки қисмида фалажлик юзага келган. У тетраплегия — барча қўл-оёқлар фалажига чалинган ва кеча-кундуз парваришга муҳтож бўлган.
«Ҳаёт билан видолашганимдан афсусда эканимни рад этмайман. Мен яхшироқ яшаш учун бор имкониятимни ишга солдим ва ўз ногиронлигимдан максимум фойда олишга уриндим, аммо ҳозир ҳам ақлий, ҳам жисмоний имкониятларим ёқасига келиб қолдим», — дея беморнинг ўлимидан олдинги гапларини келтириб ўтди Лука Кошиони уюшмаси.
Таъкидланишича, Италияда кимгадир жонига қасд қилишда ёрдам бериш аслида тақиқланган бўлса-да, 2019 йилда мамлакат Конституциявий суди баъзи истиснолар бўлиши мумкинлиги ҳақида қарор чиқарган эди.
Суд эвтаназия ўтказиш учун риоя қилиниши керак бўлган муайян талабларни белгилади. Масалан, беморни даволаб бўлмаслиги, у ҳаётни сақлаб туриш воситаларига боғлиқлиги, жисмоний ва руҳий чидаб бўлмас оғриқларни бошдан ўтказаётгани аниқ бўлиши шарт эди. Шунингдек, бемор қарор қабул қилиш ва унинг оқибатларини тушунишга тўлиқ қодир бўлиши керак эди.
Карбони 2021 йил ноябрида ахлоқ бўйича қўмитадан рухсатнома олиб, соғлиқни сақлаш органлари берган тақиқни енгиб ўтган ва ишни судга оширганди. У мамлакатда юридик рухсатномага эга бўлган биринчи одамга айланди.
Сўнг у ҳаётига нуқта қўйиш учун зарур бўлган дори ва махсус ускуна учун 5 минг евро тўплашига тўғри келди. Лука Кошиони уюшмаси маблағ йиғиш учун краудфандинг кампаниясини ишга туширди.
Шу пайтгача Евроиттифоқ мамлакатларидан фақат Бельгия, Нидерландия, Люксембург ва Испания эвтаназияни қонунийлаштирган давлатлар бўлиб келаётган эди.
Изоҳ (0)