Англиянинг “Манчестер Сити” клуби ёзги трансфер ойнасида яна бир йирик трансферни амалга оширишни режалаштирмоқда. Пеп Гвардиола жамоаси “Милан” ҳужумчиси Рафаэл Леауни ўз сафига қўшиб олишни истамоқда. Fichajes нашрининг хабар беришича, “шаҳарликлар” португалиялик футболчини қўлга киритиш учун 100 миллион евро ажратишга тайёр.
Манбага кўра, Гвардиола “Сити” ҳужум чизиғи учун янги номзодлар қидирмоқда ва Леау бу жой учун муносиб номзод бўлиб турибди. “Милан” футболчини қўйиб юборишни хоҳламаяпти, бироқ 100 миллион евролик таклиф клуб раҳбариятини жиддий ўйлаб кўришга мажбур қилиши мумкин.
Рафаэлнинг “Милан” билан шартномаси 2028 йилнинг ёзига қадар амал қилади. Футболчининг ўзи ҳозирча “россонерилар” сафини тарк этишга шошилмаяпти, аммо Гвардиола қўл остида тўп суриш имконияти унинг фикрини ўзгартириши мумкин.
Маълумот учун, 26 ёшли португалиялик ҳужумчи ўтган мавсум “Милан” сафида жами 50 та ўйинда майдонга тушиб, ўз ҳисобига 12 та гол ва 13 та голли узатма ёздириб қўйган. Transfermarkt портали Леаунинг қийматини 70 миллион еврога баҳоламоқда.
Изоҳ (0)