Германиянинг Гиссен университети профессори Петер Шрайнер раҳбарлигидаги халқаро кимёгарлар жамоаси илк бор олтита азот атомидан ташкил топган барқарор гексаазот (N6) молекуласини олишга муваффақ бўлди. Тадқиқот натижалари эса Nature журналида эълон қилинди.
Таъкидланишича, ушбу модда инсон томонидан яратилган энг юқори энергия сиғимига эга модда ҳисобланиб, экологик тоза ракета ёнилғисининг асосига айланиши мумкин.
Тадқиқот давомида Соф гексаазотни минус 196 даража ҳароратда юпқа парда кўринишида синтез қилишга эришилган.
“Бизнинг мақсадимиз - Илон Маскнинг метан двигателлари сингари CO2 эмас, балки фақат тоза ҳаво чиқарадиган азот билан ишлайдиган ракета яратишдир”, дейди профессор.
Олимлар хавфсизлик нуқтаи назаридан ҳозирча портлаш синовларини ўтказмаган бўлса-да, синов ускуналари мавжуд бўлган Дрезден мутахассислари билан ҳамкорликни йўлга қўйишган.
“Етарли маблағ бўлса, 3-5 йил ичида синовдан ўтказиш учун ракета қуриш мумкин. Бунинг учун кўплаб муҳандислик масалаларини ҳал қилиш зарур”, дейди Шрайнер.
N6 ни ҳарбий мақсадларда қўллаш назарий жиҳатдан мумкин бўлса-да, тадқиқотчилар ҳозирча мудофаа институтларидан сўров олмаган. Технологиянинг асосий афзаллиги - углерод изи йўқлиги: модда парчаланганда фақат азот ажралиб чиқади.
Бундан аввал хитойлик олимлар Илон Маскнинг космосдаги Starlink сунъий йўлдошларига қарши курашиш учун бир нечта вариантларни ўрганаётгани хабар қилинганди.
Изоҳ (0)