Бугун, 4 август куни президент Шавкат Мирзиёев амалий ташриф билан Туркманистонга етиб борди. Давлат раҳбари Туркманбоши шаҳрига келгач, Туркманистон халқ маслаҳати раиси Гурбангули Бердимуҳамедов билан учрашув ўтказди. Бу ҳақда Президент матбуот хизмати хабар берди.
Ўзбекистон президенти Туркманистонга ташрифини Гурбангули Бердимуҳамедов билан учрашув ўтказишдан бошлади.
Суҳбат аввалида Шавкат Мирзиёев Гурбангули Бердимуҳамедовни БМТнинг Денгизга чиқиш имкони бўлмаган ривожланаётган мамлакатлар бўйича учинчи конференцияси юксак савияда ўтказилаётгани билан самимий қутлаган. Кун тартибига киритилган масалалар минтақа барқарор тараққиёти учун ғоят муҳим аҳамиятга эга эканини алоҳида таъкидлаган.
“Жорий йил апрель ойида Самарқанд шаҳрида ўтган учрашувда эришилган келишувларни амалга ошириш доирасида Ўзбекистон-Туркманистон яхши қўшничилик ва стратегик шериклик муносабатларини янада мустаҳкамлашнинг долзарб масалалари кўриб чиқилди. Дўстлик, ўзаро ишонч ва умумий манфаатларни ҳисобга олиш тамойилларига асосланган кўп қиррали ҳамкорлик суръати ортиб бораётгани катта мамнуният билан қайд этилди. Барча даражаларда самарали ва фаол мулоқотлар давом этмоқда.
Йил бошидан буён товар айирбошлаш 600 миллион долларни ташкил этди. Саноат, энергетика, транспорт, қишлоқ ва сув хўжалиги, иқтисодиётнинг бошқа тармоқларида кооперация чуқурлашиб бормоқда. Биргаликда “Шовот-Тошовуз” чегараолди савдо зонаси ташкил этилмоқда, фаол ҳудудлараро алоқалар ва гуманитар алмашинувлар давом эттирилмоқда”, дейилади манбада.
Маълум қилинишича, бўлажак олий даражадаги учрашувларга тайёргарлик доирасида ҳукуматлараро комиссиялар йиғилишлари, Ишбилармонлар кенгаши, Ҳудудлар форуми, қатор маданий тадбирлар ўтказилиши кўзда тутилган. Шунингдек, БМТ конференцияси кун тартиби ҳамда жорий йил кузда Тошкент шаҳрида ўтказилиши режалаштирилган Марказий Осиё давлатлари раҳбарларининг 7-маслаҳат учрашуви юзасидан атрофлича фикр алмашилган.
Маълумот учун, “Аваза” миллий сайёҳлик зонасида бўлиб ўтадиган тадбирда БМТ бош котиби Антониу Гутерриш, хорижий давлатлар ва ҳукуматлар, халқаро ва минтақавий ташкилотлар раҳбарлари қатнашади.
Конференция кун тартибидан транспорт жиҳатидан ўзаро боғлиқликни мустаҳкамлаш ва савдо тартиб-таомилларини соддалаштириш, иқтисодий трансформация, иқлим ўзгариши ва атроф-муҳит учун хатарларга бардошликни ошириш, Барқарор ривожланиш мақсадларини рўёбга чиқаришда халқаро ҳамкорликни ривожлантиришнинг долзарб масалалари ўрин олган. “Аваза” сиёсий декларацияси ва ҳаракатлар дастурининг қабул қилиниши кўзда тутилган.
Эслатиб ўтамиз, Шавкат Мирзиёев 2024 йил октябрь ойида амалий ташриф билан Туркманистонга ташриф буюрган эди. Сафар давомида президент туркман шоири ва мутафаккири Махтумқули Фироғий таваллудининг 300 йиллигига бағишланган “Замон ва цивилизацияларнинг ўзаро боғлиқлиги – тинчлик ва тараққиёт асоси” халқаро форумининг ялпи мажлисида нутқ сўзлаганди.
Изоҳ (0)