Тошкент шаҳри Юнусобод туманида электр тармоқлари корхонасининг сохта ходимлари ушланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департамент томонидан ИИВ ходимлари билан ҳамкорликда тезкор тадбир ўтказилган. Унда ўзларини Юнусобод тумани ЭТК ходимлари деб таништирган М.Й. ва Д.К. Юнусобод тумани 4-мавзе 54-уйдаги хонадоннинг электр ҳисоблагичи (тамғалари бузилмаган) нотўғри уланганини рўкач қилгани аниқланган. Улар шу бўйича тармоқдан узиш ҳақида тузилган далолатномани рўйхатдан ўтказмаслик эвазига хонадон эгаси А.дан 200 долларни олган вақтида ашёвий далиллар билан ушланган.
Шунингдек, ўтказилган терговга қадар текширувда Юнусобод тумани ЭТК «АСКУЭ» ходими Х.М. фуқаро М.Й.га 22-сонли сохта гувоҳномани ясаб бергани аниқланган.
Ҳолат юзасидан Жиноят кодексининг 168-моддаси (фирибгарлик) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилган. Ҳозирда тергов ҳаракатлари ўтказилмоқда.
Изоҳ (0)