Ўзбекистондаги истироҳат боғларидаги 574 та аттракцион техник носоз деб топилди, уларнинг фаолияти чекланиб, ишлатмаслик чоралари кўрилди. Бу ҳақда АОКА ўтказилган брифингда Саноат хавфсизлиги давлат қўмитаси ахборот хизмати раҳбари Малика Миржамолова маълум қилди.

Маълум қилинишича, ишчи гуруҳлар томонидан республикадаги мавжуд 143 та маданият ва истироҳат боғидаги 1879 та ҳар хил турдаги аттракцион (кичик аттракционлар ҳам) қайта ўрганиб чиқилган.

Ушбу аттракционларнинг 450 га яқини истироҳат боғлари тасарруфида бўлса, қолганлари хусусий тадбиркорларга тегишли бўлиб шартнома асосида фойдаланилади.

Ўрганишлар натижалари бўйича 574 та техник носоз деб топилган аттракционлар фаолияти чекланиб, ишлатмаслик чоралари кўрилган. Аниқланган камчиликлар юзасидан тегишли далолатномалар расмийлаштирилиб, камчилик аниқланган аттракционларни фойдаланмаслик шарти ҳамда камчиликлар бартараф қилингунга қадар тўхтатиб қўйиш бўйича маҳаллий давлат органларига ахборотномалар ҳамда маданият ва истироҳат боғлари раҳбарларига 116 та тақдимнома берилган.

Саноат хавфсизлиги давлат қўмитаси ва Техник жиҳатдан тартибга солиш агентлиги билан биргаликда «Аттракционлар хавфсизлиги тўғрисидаги умумий техник регламентни тасдиқлаш ҳақида»ги Вазирлар Маҳкамасининг қарори лойиҳаси ишлаб чиқилиб, «Project.gov.uz» тизими орқали манфаатдор вазирлик ва идоралар билан келишилган, Адлия вазирлигидан ҳуқуқий экспертиза натижалари бўйича ижобий хулоса олинган ва Вазирлар Маҳкамасига киритилган.

Шунингдек, Саноат хавфсизлиги давлат қўмитасининг «Аттракционлардан хавфсиз фойдаланиш қоидаларини тасдиқлаш ҳақида»ги қарори лойиҳаси идоравий норматив-ҳуқуқий ҳужжат сифатида ишлаб чиқилган. Мазкур лойиҳа вазирлик ва идоралар билан келишиш учун юборилган. Ҳозирда «Аттракционлардан хавфсиз фойдаланиш қоидаларини тасдиқлаш ҳақида»ги қарор лойиҳаси вазирлик ва идоралар томонидан билдирилган таклиф ва эътирозларни инобатга олган ҳолда Адлия вазирлигига киритиш учун қайта кўриб чиқилмоқда.

Эслатиб ўтамиз, 2019 йилда Жиззахда аттракцион қулаши оқибатида 20 ёшли қиз ҳалок бўлган, Намангандаги кўнгилочар истироҳат боғида 18 ёшли қиз аттракционда олган тан жароҳати туфайли вафот этганди.