Honda ўзининг биринчи электр скутерини тақдим этди

Электр скутерлар ишлаб чиқариш учун Honda Striemo шўъба корхонасини ишга туширди. Бу ҳақда «vc.ru» хабар берди.

У ишлаб чиққан биринчи қурилма уч ғилдиракли электр скутер бўлиб, уни Honda’нинг ўзи «электр микромобиллик маҳсулоти» деб атайди.

Японияда ушбу электр скутерлар 2022 йил охиригача, Европа бозорида 2023 йилда сотувга чиқарилади. Дастлабки 300 та скутер онлайн тарзда 1900 доллардан сотилади.

Honda’нинг фикрича, Striemo икки ғилдиракли электр скутерлардан исталган тезликдаги юқори барқарорлиги билан ажралиб туради.

У «миллиметргача ҳисобланган» тортишиш маркази ва мувозанатни қўллаб-қувватлаш механизми ва махсус дизайн билан таъминланган.

Скутернинг оғирлиги 20 кг. У учта тезлик режимига эга: 6 км/соат, 15 км/соат ва максимал 25 км/соат. Бир зарядланганда 30 км масофани босиб ўта олади.