Самарқанд вилояти Булунғур туманида сохта ички ишлар ходимаси қўлга олинди. Бу ҳақда вилоят Ички ишлар бошқармаси хабар қилди.
Қайд этилишича, патруллик текширув тадбирлари давомида туманнинг «Меҳржон» маҳалласи ҳудудида фуқаро И.Н. ички ишлар органлари ходимларининг кийимида (енги калта кўк кўйлак, шим, бош кийимсиз ва погонларсиз) юргани аниқланган.
Ўтказилган суҳбат давомида маълум бўлишича, аёл формани Самарқанд шаҳрида жойлашган чевархоналардан сотиб олган.
Ҳолат юзасидан терговга қадар текширув ҳаракатлари олиб борилмоқда.
Аввал ҳам Самарқандда сохта ички ишлар ходими қўлга олинганди. У ИИБ хизмат кийимида тушган фотосурати мавжуд бўлган қалбаки гувоҳномани ўзи билан олиб юрган.
Бундан ташқари, Андижонда фуқароларнинг телефони ва пулларини ўғирлаган сохта ИИБ ходими ушлангани, Самарқандда қизга яхши кўриниш учун ИИБ хизмат кийимини ноқонуний кийган йигит қўлга тушгани, Андижонда фуқаролардан паспорт ва никоҳ гувоҳномаси қилдириб бериш учун пул олган сохта ИИБ ходими фош бўлгани ҳақида хабар берилган.
Изоҳ (0)