Британия полицияси Россия фойдасига жосусликда гумонланаётган эркакни қўлга олди, деб хабар бермоқда BBC News.
13 июнь куни кечқурун Лондоннинг Гетвик аэропортида 40 ёшли эркак Буюк Британиядан чиқиб кетмоқчи бўлган вақтида қўлга олинди. Тергов давом этаётгани сабаб у Лондон полициясининг ҳибсхонасида қолмоқда.
Гумонланувчининг исми ва бошқа тафсилотлар ҳозирча ошкор этилмаган. Полиция вакилининг айтишича, қўлга олинган шахс «Давлат сирларини ҳимоя қилиш тўғрисида»ги қонуннинг биринчи қисмини бузганликда гумон қилинмоқда. 1911 йилда қабул қилинган қонуннинг ушбу қисми «душманга фойдали бўлиши мумкин бўлган» қайдлар, режалар ёки чизмалар кўринишидаги маълумотлар билан боғлиқ.
Буюк Британия ва Россия ўртасидаги муносабатлар Россиянинг Украинага бостириб киришидан кейин янада мураккаблашди. Британия ҳукумати Украинани қўллаб-қувватламоқда, Британия бош вазири Борис Жонсон уруш бошланганидан кейин шахсан Киевга ташриф буюрди.
Россия ва Буюк Британия бир-бирига қарши бир нечта санкциялар пакетини жорий қилди. Хусусан, 14 июнь куни Россия Ташқи ишлар вазирлиги 49 нафар Британия фуқаросини санкциялар рўйхатига киритди, улар орасида BBC News, Financial Time, The Independent, The Times, The Daily Telegraph, The Guardian ва бошқа нашрлар журналистлари ҳам бор.
Изоҳ (0)