АҚШдан ташқари яна 40 дан ортиқ давлат Украинага ҳарбий ва бошқа турдаги ёрдамни кўрсатмоқда, деди АҚШ давлат котиби Энтони Блинкен. Унинг баёноти Давлат департаменти матбуот хизмати томонидан эълон қилинди.
«Украинанинг мустақиллиги, суверенитети ва ҳудудий яхлитлигини ҳимоя қилиш, жанг майдонида ғалабаларини таъминлаш ва музокаралар столидаги позициясини мустаҳкамлаш мақсадида Қўшма Штатлар, шунингдек, 40 дан ортиқ иттифоқчи ва ҳамкорларимиз томонидан Украинага хавфсизлик ёрдамини кўрсатиш давом этмоқда», — деди давлат котиби.
Блинкеннинг сўзларига кўра, уруш бошланганидан бери АҚШ Украинага 5,6 миллиард доллардан ортиқ маблағ ажратган. Шундан охирги марта 1 миллиард долларлик ҳарбий ёрдам пакети ҳақида 15 июнь куни АҚШ президенти Жо Байден эълон қилганди. Ёрдам артиллерия қуроллари ва қирғоқ мудофаасига мўлжалланган воситаларни, шунингдек артиллерия ўқ-дориларини ва илғор ракета тизимларини ўз ичига олиши айтилган. Қўшма Штатлар, шунингдек, Киевга аҳоли учун 225 миллион доллар миқдоридаги инсонпарварлик ёрдамини ўтказишга қарор қилди, маблағ жумладан, ичимлик суви, озиқ-овқат, тиббий буюмлар ва фуқароларга асосий эҳтиёжларни сотиб олиш учун йўналтирилади.
Украинага ҳарбий ва бошқа турдаги ёрдамни АҚШдан ташқари Чехия, Буюк Британия, Германия, Франция, Дания, Нидерландия, Япония, Австралия, Литва, Италия, Испания ва бошқа давлатлар кўрсатган.
Россия расмийлари Ғарб қуроллари ортилган карвонларни қонуний ҳарбий нишон сифатида кўришини бир неча бор таъкидлаган. Шунингдек, Кремль ҳарбий таъминот Россиянинг «махсус операция»дан кўзлаган мақсадларига эришишига тўсқинлик қила олмаслигини ҳам иддао қилган. Россия президенти Владимир Путин мамлакат армияси «Украинада Америка қуролларини ёнғоқдек чақиб ташлагани» ва қўшинлар аллақачон ўнлаб комплекслар, снарядлар ва турли иншоотларни йўқ қилганини айтган эди.
Изоҳ (0)