Украина Ғарб мамлакатларидан ўзи сўраган ҳарбий ёрдамнинг 10 фоизинигина қабул қилган. Бу ҳақда мамлакат мудофаа вазири ўринбосари Анна Маляр маълум қилди, деб ёзади Meduza.
«Украина қанча кўп саъй-ҳаракатлар қилмасин, армиямиз қанчалик даражада профессионал бўлмасин, ғарблик шерикларимиз кўмагисиз бу урушда ғолиб бўла олмаймиз… Украина сўраган, бизга керак бўлган нарсаларнинг тахминан 10 фоизини олдик», — деди у.
Маляр қўшимча қилишича, Ғарб мамлакатлари Украинага ҳарбий кўмак беришни тезлаштириши ва уни етказиш бўйича аниқ муддатлар ўрнатиши керак. «Афсуски, биз жуда узоқ кутолмаймиз, чунки вазият ўта мураккаб», — деди мудофаа вазири ўринбосари.
13 июнь куни Украина президенти офиси раҳбари маслаҳатчиси Михаил Подоляк уруш тугаши учун Украинага 155 миллиметр калибрли мингта гаубица, 300 та баравар ўт очиш реактив тизимлари, 500 та танк, икки мингта зирҳли техника ва мингта учувчисиз учар қурилмалар кераклигини айтганди.
Сўнгги ҳафталарда Украина ҳукумати ғарб мамлакатларидан янги қуролларни етказиб беришни фаол равишда сўрамоқда. Уларнинг сўзларига кўра, бу Украинага Донбассдаги оғир вазиятни енгиб ўтишда ёрдам беради, у ерда эса Россия ҳарбий техника бўйича жиддий устунликка эга бўлиб турибди.
14 июнь куни НАТО бош котиби Йенс Столтенберг Ғарб мамлакатларини Украинага кўпроқ оғир қурол-яроғ йўналтиришга чақирди.
Изоҳ (0)