АҚШ бўғознинг мақоми бўйича Хитой билан баҳсда Тайванни қўллаб-қувватлади

АҚШ Тайваннинг оролни қитъа Хитойидан ажратиб турувчи бўғоз халқаро сув йўли эканлиги ҳақидаги даъвосини қўллаб-қувватлади. Бу ҳақда Давлат департаменти вакили Нед Прайс маълум қилди, деб ёзади «РБК».

«Тайван бўғози халқаро сув йўли ҳисобланади, бу эса Тайван бўғози очиқ денгиз эркинлиги, шу жумладан, кемалар қатнови ва парвозлар эркинлиги халқаро қонунларга мувофиқ кафолатланадиган ҳудуд эканини билдиради», — дейилади хабарда.

Бундан ташқари, давлат котиби Энтони Блинкен АҚШ Тайванга «ўз-ўзини мудофаа қилиш» соҳасида кўмак беришда ва Пекиннинг қарорига таъсир ўтказишда давом этишини маълум қилди.

Тайван — Жануби-Хитой денгизида, Хитой Халқ Республикаси қирғоқларидан тахминан 150 км масофада жойлашган орол. 1949 йилда, инқилоб чоғида, ҳудуд Хитойдан ажралиб чиққани ҳақида эълон қилди, бироқ Пекин уни Хитой провинцияларидан бири деб ҳисоблайди.

АҚШ Тайван билан расмий дипломатик алоқаларга эга эмас, бироқ айни вақтда унга қурол-яроғ сотади. Расман АҚШ «ягона Хитой» тамойилини қўллаб-қувватлайди.

14 июнь куни Хитой етакчиси Си Цзиньпин ҳарбий кучлардан «ноҳарбий» мақсадларда фойдаланишга рухсат берувчи директивани имзолади. Radio Free Asia порталига кўра, шу йўл билан Пекин уруш эълон қилмасдан «махсус операция» ниқоби остида Тайванга бостириб киришга тайёрланиши мумкин. Фармон 15 июндан кучга киради ва асосий принциплар: қўшинларни ташкил этиш, бошқариш, операциялар турлари, тезкор таъминлаш ва сиёсий ишларни, шунингдек, жанговар топшириқларни бажаришни тартибга солади. Шу билан бирга, ҳужжатда белгиланган мақсадлар қаторига миллий суверенитет, минтақавий барқарорликни сақлаш ҳамда махсус операцияларни ташкил этиш ва ўтказишни тартибга солиш ҳам киради.