Фарғонада экспорт ҳажми 1,1 млрд долларга етиши кутилмоқда — S&P Global Ratings вилоятнинг кредит рейтингини эълон қилди
S&P Global Ratings Фарғона вилоятига «барқарор» прогнозли узоқ муддатли кредит рейтингини «B+» деб белгилади. Бу ҳақда UzDaily хабар берди.
Қайд этилишича, вилоятнинг қарзи йўқ. Маҳаллий бюджет кўрсаткичлари ҳам ижобий. Келгуси уч йилда вилоят бюджет даромадлари республика трансфертлари ҳисобидан режани ортиғи билан бажариши кутилмоқда.
Фарғонада сўмдаги ялпи ҳудудий маҳсулот ҳажми кейинги беш йилда 228 фоиз ёки уч баробардан кўпроқ, саноат ҳажми 2,8 баробар ошди. 2022 йилда 13 фоиз номинал ўсиш кутилмоқда.
2021 йилда жалб қилинган хорижий инвестициялар ҳажми 512 млн долларни ташкил этди.Шу билан бирга, январь май ойларида бу кўрсаткич 411 млн доллардан ошди. 2022 йил охирига келиб эса 1 млрд доллардан ошиши кутилмоқда.
Фарғона вилоятида 2021 йилда экспорт ҳажми 756 млн долларни ташкил этган бўлса, жорий йилда экспорт кўрсаткичи 1,1 млрд долларга етиши кутилмоқда.
S&P Global Ratings Ўзбекистон аҳолисининг 11 фоизи ушбу минтақада бўлишига қарамай, минтақанинг Ўзбекистон ялпи ички маҳсулотидаги улуши бор-йўғи 6 фоизни ташкил этишини таъкидлайди.
Аввалроқ Фарғонадаги компаниянинг 40 фоиз давлат улуши 20 млрд сўмга аукционга қўйилгани ҳақида хабар берилган эди.
