Конституцияга ўзгаришлар киритиш бўйича берилаётган таклифларда Ўзбекистонда инсофсиз рақобат ва монополияга йўл қўйилмаслиги белгиланишини сўрашмоқда. Бу ҳақда «Миллий тикланиш» партияси етакчиси, Конституциявий комиссия раиси ўринбосари Алишер Қодиров Наманганда ўтказилган конституциявий ислоҳотларга бағишланган мулоқотда маълум қилди, дея хабар беради «Дарё» мухбири Азизбек Абдувалиев.

«Олдинлари бунинг имкони йўқ эди, энди эса амалга ошириш мавриди келди. Кўпчилик мени монопол ташкилотлар, хусусан, UzAuto Motors’ни қўллаб-қувватлайди, деб ўйлайди. Энергетика соҳасида энди бозор механизмлари шаклланяпти ва бу тўғри деб ҳисоблайман. Инвесторлар давлат билан шерикчилик қилмайди, чунки давлат бизнес-структура эмас, унинг бошқа вазифалари бор. Келади, кўради — энергия бозори тўлиқ давлат тасарруфида. Пул тикмайди ва қайтиб кетади. Ўтган йиллар мобайнида машиналар харид қилган одамлардан монополия ҳисобига орттирилган даромад аҳолига энергетика соҳасида берилган субсидияларни қоплашга сарфланди, десак бу ҳам қайсидир маънода тўғри бўлади», — деди Алишер Қодиров.

Қодировнинг айтишича, Конституциявий комиссияга ҳозиргача 15 мингдан ортиқ таклиф келиб тушган. Комиссия эса ҳар жума куни йиғилишларида бу таклифларни кўриб чиқмоқда.

«Кўриб чиқилаётган таклифларнинг асосий негизи шундаки, фуқаро ва давлат ўртасидаги ҳар қандай низоли ёки мавҳум ҳолат инсон фойдасига ҳал бўлсин. Мулкдорнинг мулкига суд қарорисиз дахл этиш мумкин эмас. Оила масалаларига кўп эътибор қаратиляпти. Жумладан, никоҳ ‘томонларнинғ эмас, айнан эркак ва аёлнинг ихтиёрий розилиги ва тенг ҳуқуқлилигига асосланиши. Оталик институти, оталарнинг мажбурияти ва масъулияти кучайтирилиши зарур, аксар ҳолатларда аёллар ажримдан сўнг болалари ва муаммолари қуршовида қолиб кетяпти. Ҳар бир инсон иш ўрни ва адолатли маошга эга бўлиши керак. Шунингдек, иш вақти ҳам аниқ-тиниқ белгиланиб қўйиши керак. Чунки шанба-якшанба ва кечки пайт ҳам ишлайвериш оқибатида оилаларда парокандалик юзага келяпти, фарзандлар тарбияси аро йўлда қолиб кетяпти. Бу, хусусан, давлат хизматчиларига тегишли», — деди «Миллий тикланиш» партияси раҳбари.

Алишер Қодировга кўра, конституцияда тиббий ёрдамнинг кафолатланган даражаси ва мактабгача таълим ташкилотлари давлат назоратига олиниши аниқ кўрсатилиши керак.

«Ҳозир боғчаларда 75 нафар болага бир тарбиячи тўғри келяпти. Ижтимоий тармоқларда кўриб қоляпмиз, болаларга нисбатан совуққон, қўпол муносабатда бўлинаётгани, айрим ҳолатларда ҳатто жазо қўлланаётганини. Бундай муомалани кўрган бола эртага ўзи ҳам бешафқат ва зўравон бўлиб улғаяди. Шу сабабли бу соҳада ҳам қатъий давлат назорати ўрнатилиши керак», — дейди Алишер Қодиров.

Мулоқот давомида иштирокчилар томонидан конституцияда маҳалла мақомини белгилаш, қишлоқ фуқаролар йиғинларини тиклаш, коррупцияга қарши моддаларни киритиш, ОАВ жамиятда тутган мавқейини кучайтириш, давлат байроғи ўрнатилиши тартибини соддалаштириш каби кўплаб таклиф ва мулоҳазалар билдирилди. Алишер Қодиров уларнинг аксари жўяли эканлигини таъкидлаб, таклифларни Конституциявий комиссияга юбориш ва бу муҳим сиёсий жараёнда фаол иштирок этишга чақирди.

Мавзуга доир:

Конституциянинг никоҳга оид бандига ўзгартириш киритиш таклифи билдирилди

Конституциянинг дам олиш ҳуқуқига оид моддасига ўзгартириш киритиш таклиф этилди