Тошкент вилоятида муқаддам содир этган фирибгарлик ҳаракатлари учун халқаро қидирувда бўлган шахс қўлга олинди, деб хабар беради ИИВ Киберхавфсизлик маркази.
Маълум қилинишича, 2020 йилнинг октябрь ойидан 2021 йилнинг апрель ойига қадар Ш.С. исмли шахс 4 нафар шериги билан «Lid car» номли МЧЖ ташкил этган. Улар «3 йил муддатга 15 фоизлик кредит» асосида 90 кун ичида автомашина олиб бериш ҳақида ёлғон ахборотларни Telegram’даги «Avtokredit Lid car offcial» номли канал орқали тарқатиб, фуқароларни алдаб, уларнинг пул маблағларини фирибгарлик йўли билан ўзлаштириб келган.
Мазкур уюшган гуруҳ дастлаб фаолиятини Тошкент шаҳрида, сўнг Қашқадарё ва Андижон вилоятларида олиб бориб, 100 нафарга яқин фуқаронинг жами 1,6 миллиард сўм пулларини ноқонуний равишда қўлга киритган.
Уюшган гуруҳнинг жиноий фаолияти юзасидан Жиноят кодексининг 168-моддаси (фирибгарлик) 4-қисми «а, в» бандлари билан жиноят иши қўзғатилиб, тергов ҳаракатлари олиб борилган. Бироқ уюшган жиноий гуруҳ ташкилотчиси 32 ёшли Ш.С. терговдан бўйин товлаб, жавобгарликдан қутилиш мақсадида яширингани сабабли халқаро қидирувга берилган эди.
8 июнь куни ИИВ Киберхавфсизлик маркази томонидан олиб борилган тезкор-қидирув тадбирлари натижасида 2021 йилнинг ноябрь ойидан буён қидирувда бўлган Ш.С. Тошкент вилояти Чирчиқ шаҳри ҳудудида хонадонларда яшириниб яшаб келаётгани аниқланиб, қўлга олинган ва тергов органига топширилган.
Изоҳ (0)