Россия президенти Владимир Путин мамлакат ҳукуматининг бугунги сиёсати XVIII асрда Пётр I чекига тушган «қайтариш ва мустаҳкамлаш»дан иборатлигини қайд этди. Бу ҳақда Meduza хабар берган.
Путин ёш тадбиркорлар, муҳандислар ва олимлар билан учрашувда Россия давлатининг асосий вазифалари Пётр I ҳукмронлиги давридан бери деярли ўзгармаганини таъкидлади.
Россия президентининг фикрича Швецияга қарши Шимолий урушда Пётр I ҳеч нимани тортиб олмаган, аксинча қайтарган. Сабаби Приладожеда фин-угор халқлари билан бирга славянлар ҳам яшаган ва ҳудуд Россия давлати ихтиёрида бўлган.
Пётр I қаерга бормасин энг аввало ерларни қайтарган ва янада мустаҳкамалаган. Бизнинг зиммамизга ҳам қайтариш ва мустаҳкамлаш чеки тушди.Владимир Путин
Путин учрашувда Россия ҳукумати зиммасидаги вазифалар ҳақида гапирган вақтда кулиб ҳам қўйган.
Россия 24 февралдан буён Украинада махсус ҳарбий операция ўтказмоқда. Дастлаб Путин Украина ҳудудига бостириб кирмоқчи эмаслигини эълон қилган, бироқ кўплаб расмий ва норасмий хабарларга кўра Россия урушнинг дастлабки кунларида эгаллаб олинган Украина жанубидаги ҳудудларни ўзига қўшиб олишни кўзламоқда.
2014 йилда Россия Владимир Путин раҳбарлигида Украинага тегишли бўлган Қримни ўзига қўшиб олганди.
Изоҳ (0)