Қозоғизистон парламенти Сенати раиси Маулен Ашимбаев Қозоғистон биринчи президентининг мамлакат сиёсатидаги ўрни ҳақидаги саволга жавоб берди, дея хабар бермоқда Tengrinews нашри.
«Қозоғистоннинг биринчи президенти Нурсултон Назарбоев бугунги кунда сиёсатга аралашмаяпти. Эҳтимол, буни ўзингиз ҳам кўрмоқдасиз. Албатта, референдум, сайлов каби кенг кўламли сиёсий тадбирларда у мамлакат фуқароси сифатида иштирок этиши мумкин. Барча масалалар қонун ҳужжатларида белгиланган тартибда ҳал этилади.
Нурсултон Абишевич референдумда овоз берди, бу ҳар бир фуқаронинг ҳуқуқи. Лекин сиёсатчи, биринчи президент сифатида Қозоғистон сиёсатига аралашмайди», — дея журналистлар саволларига жавоб берган Ашимбаев.
5 июнь куни Нурсултон Назарбоев конституцияга ўзгартиришлар киритиш бўйича референдумда овоз берди.
2022 йил январида Нурсултон Назарбоев ўзига йўлланган мурожаатларга жавоб берар экан, 2019 йилда президент ваколатларини Қосим-Жўмарт Тўқаевга топширганини ва шундан бери нафақахўр эканлигини маълум қилган эди. Шунингдек, у Тўқаев президент сифатида тўлиқ ваколатга эга эканлигини таъкидлаган.
Изоҳ (0)